CƏMİYYƏT
Binəqədi rayonunda oğurluqla məşğul olan qadın saxlanılıb
Bakı, 13 iyun, AZƏRTAC
Oğurluqla məşğul olan şəxslərin aşkarlanaraq tutulması istiqamətində daxili işlər orqanları tərəfindən uğurlu əməliyyat tədbirləri davam etdirilir.
Daxili İşlər Nazirliyinin mətbuat xidmətindən AZƏRTAC-a bildiriblər ki, iyunun 7-də M.Ə.Rəsulzadə qəsəbəsindəki mağazaların birindən 2 ədəd mobil telefon oğurlamaqda şübhəli bilinən Bakı şəhər sakini N.Həsənova Binəqədi Rayon Polis İdarəsinin 4-cü Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində saxlanılıb.
Cari il yanvarın 2-də paytaxt sakini olan bir qadının içərisində pul və mobil telefon olan pulqabısını oğurlamaqda şübhəli bilinən Bakı şəhər sakini R.Cəfərov isə Səbail Rayon Polis İdarəsinin 9-cu Polis Bölməsi və Metropolitendə Polis Şöbəsi əməkdaşlarının keçirdikləri əməliyyat-axtarış tədbirləri nəticəsində yaxalanıb.
Faktlarla bağlı araşdırmalar davam etdirilir.