CƏMİYYƏT
Birgə monitorinqlər Nəsimi rayonunda davam etdirilib
Bakı, 30 sentyabr, AZƏRTAC
Bakı Şəhər İcra Hakimiyyəti (BŞİH) və “Regional İnkişaf” İctimai Birliyi (RİİB) arasında imzalanmış “Əməkdaşlıq Memorandumu” çərçivəsində paytaxt rayonlarında aparılan birgə monitorinqlər Nəsimi rayonunda davam etdirilib.
İcra Hakimiyyətindən AZƏRTAC-a bildiriblər ki, rayon ərazisində mövcud çatışmazlıqların aradan qaldırılması məqsədilə icra hakimiyyətinin əməkdaşları və RİİB könüllülərindən ibarət monitorinq qrupları reydlər keçirib.
Küçə və prospektlərdə, park və məhəllələrdə aparılan monitorinqlərin nəticələri əsasında yaşıllıq zolaqlarının salınması, küçələrin işıqlandırılması, asfalt örtüklərinin yenilənməsi, abadlıq işlərinin görülməsi, sakinlərin rahat və təhlükəsiz hərəkəti üçün səkilərin salınması və digər istiqamətlərdə təkliflər hazırlanır.
Növbəti mərhələdə təkliflərin aidiyyəti qurumlarla əməkdaşlıq əsasında reallaşdırılması üçün tədbirlər görüləcək.
Qeyd edək ki, daha əvvəl Səbail, Yasamal, Suraxanı, Binəqədi, Nərimanov rayonlarında keçirilmiş monitorinqlərin nəticələri üzrə bir sıra küçə və prospektlərdə səkilər təmir edilib, ağaclar budanıb, yaşıllıqlar salınıb, işıqlandırma sistemləri qurulub və digər zəruri abadlaşdırma işləri görülüb.