MƏDƏNİYYƏT


Braziliyanın “Choronas” qrupu Beynəlxalq Muğam Mərkəzində çıxış edib

Bakı, 27 iyun, AZƏRTAC

Beynəlxalq Muğam Mərkəzində iyunun 27-də Braziliyanın məşhur “Choronas” instrumental musiqi qrupunun konserti keçirilib.

AZƏRTAC xəbər verir ki, qrupun Bakıya gəlişi Beynəlxalq Muğam Mərkəzi ilə Braziliyanın ölkəmizdəki səfirliyi arasında bağlanan Anlaşma Memorandumu əsasında baş tutub.

Braziliyanın ölkəmizdəki səfiri Manuel Monteneqro “Choronas” qrupunu tamaşaçılara təqdim edib. O deyib: “Braziliyanın çoxsaylı dostları ilə Beynəlxalq Muğam Mərkəzində olmaq bizim üçün əsl zövqdür. Bu axşam qrupun unikal musiqiçilərini təqdim etməkdən qürur duyuram. Braziliyanın musiqisini bilən hər kəs bu gecədən həzz alacaq. Azərbaycanda muğam, Argentinada tanqo, ABŞ-da cazz, Braziliyada isə şoro musiqisi milli kimliyinin mərkəzində durur. Şoro janrın mənşəyi Braziliyanın ənənələrində özünü tapır. Bu axşam Braziliyanın 200 illik müstəqilliyinə həsr olunur və qrupun Şərqi Avropada ilk çıxışıdır”.

Proqramda “Tiko tiko no fubu”, “Dono da bola”, “Delicado”, “Eu quero e sossego”, “Choro de domingo” və digər mahnılar ifa olunub. “Carinhoso” və “Edgar foi a feira” mahnıları İsmayıl Zülfüqarovun tarı ilə sintez olunub.

Ümumilikdə gecədə 18 instrumental musiqi səsləndirilib.

Qeyd edək ki, “Choronas” qrupu ilk dəfədir ki, Bakıda çıxış edir. 1994-cü ildə San-Paulu musiqiçiləri tərəfindən yaradılan ansambl bu günə kimi dünyanın bir çox səhnələrində konsert proqramı ilə çıxış edib. “Choronas”ın repertuarında Braziliya populyar musiqisinin sevimli klassiklərinin və müasir bəstəkarlarının əsərləri yer alır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.