DÜNYA


Bu il Almaniyaya gəlmiş qaçqınların sayı elan edilib

Berlin, 10 oktyabr, AZƏRTAC

Bu ilin əvvəlindən Almaniyaya təqribən 100 min qaçqın gəlib.

AZƏRTAC xəbər verir ki, AFR daxili işlər naziri Horst Zeyehofer bu məlumatı oktyabrın 10-da mühafizəkar XDİ/XSİ bloku fraksiyasının iclasında elan edib.

Adətən noyabr və dekabr aylarında Almaniyaya miqrant axını azalır. Buna görə DİN rəhbəri hesab edir ki, bu il miqrantların ümumi sayı 200 mini aşmayacaq.

Zeyehofer əvvəllər bu rəqəmi hədəf göstəricisi adlandırır və deyirdi ki, “bu, bizim gücümüz xaricindədir” və belə hallarda “inteqrasiya köməyə gələcək”. Nazir deyirdi: “Hesab edirəm ki, bu həddin hər hansı şəkildə aşılması ifrat yük olacaq”. Zeyehofer hələ iyun ayında ehtiyatla söyləyirdi ki, “böyük koalisiya” tərəfindən miqrantların sayı üçün oriyentir kimi göstərilən 180-220 min rəqəmi “əslində daha çox ola bilər”.

Parlamentdə Sollar partiyası fraksiyasının daxili siyasət üzrə eksperti Ulla Yelpke nazir tərəfindən bu cür söhbətləri “araqızışdırma” adlandırırdı.

Sentyabrın ortalarında 376 nəfər aktyor, rejissor, jurnalist, alim, rəssam və musiqiçi, o cümlədən Berlin Kinofestivalının rəhbəri Diter Kosslik, rejissor Eberhard Keler, yazıçı Tereziya Mora və başqaları Zeyehoferi istefaya göndərməyə çağıran məktubu imzalayıblar. Bu məktubu imzalayanların sözlərinə görə, nazir “immiqrant mənşəli 18,6 milyon nəfəri girov götürüb və onları problemlərin mənbəyi elan edib”.

Vüqar Seyidov

AZƏRTAC-ın xüsusi müxbiri

Berlin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.