CƏMİYYƏT


Bu il Azərbaycan Tibb Universitetini 1007 gənc bitirir

Bakı, 28 iyun, AZƏRTAC

İyunun 28-də Azərbaycan Tibb Universitetində (ATU) “Məzun günü” keçirilib.

AZƏRTAC xəbər verir ki, tədbirdə ATU-nun rektoru, professor Gəray Gəraybəyli həkim adı qazanan gəncləri təbrik edib, uğurlar arzulayıb.

Rektor ümummilli lider Heydər Əliyevin və onun siyasi kursunun layiqli davamçısı Prezident İlham Əliyevin təhsilə qayğısından danışıb. O deyib: “Ulu Öndərin qərarı ilə universitetimizdə hərbi tibb fakültəsi fəaliyyətə başlayıb. Fakültənin məzunları peşə borclarını həmişə uğurla yerinə yetiriblər. Ənənəmizə sadiq qalaraq, bu il 121 məzunu hərbi həkim və feldşer kimi Vətənə xidmətə göndəririk”.

Universitetin tədris şöbəsinin müdiri Samir Cavadov bildirib ki, bu il ATU-nu 1007 nəfər bitirib. Belə ki, birinci müalicə-profilaktika fakültəsindən 302, ikinci müalicə-profilaktika fakültəsindən 307, stomatologiya fakültəsindən 133, tibbi profilaktika fakültəsindən 74, əczaçılıq fakültəsindən 71 nəfər məzun olub. Məzunlardan 75-i hərbi həkim, 45-i hərbi feldşerdir, 85 nəfər xarici ölkə vətəndaşdır. Məzunlardan 88-i universiteti fərqlənmə diplomu ilə bitirib. Qeyd edilib ki, təhsil ocağında 26 ölkədən olan tələbələr də təhsil alırlar. Tədris zamanı tətbiq edilən yeniliklər, praktik məşğələlərə üstünlük verilməsi və qabaqcıl dünya ölkələrinin tibbi təhsil ocaqları ilə əməkdaşlığın ildən–ilə genişləndirilməsi məzunların daha yaxşı mütəxəssis kimi yetişməsinə səbəb olur.

Sonra məzunlar müqəddəs həkim peşəsinin öhdəsindən layiqincə gələcəkləri və onun şərəfini uca tutacaqları barədə Hippokrat andı içiblər.

Daha sonra rektor universiteti fərqlənmə ilə bitirən məzunlardan bir qrupuna diplomlar təqdim edib.

Səhiyyə Nazirliyinin aparat rəhbəri Zəkiyyə Mustafayeva, ATU-nun histologiya, embriologiya və sitologiya kafedrasının müdiri, professor Eldar Qasımov, universitetin keçmiş məzunu Abbas Bağırov təhsillərini başa vuraraq həkim adı qazanan gəncləri təbrik edib, onlara xalqımızın sağlamlığı keşiyində ləyaqətlə dayanmağı arzulayıblar.

Məzunlar müəllimlərə və ATU-nun rəhbərliyinə minnətdarlıqlarını bildirib, həkim adının müqəddəsliyini qoruyacaqlarına, onlara göstərilən etimadı doğruldacaqlarına söz veriblər.

Ənənəvi olaraq, məzunlardan biri lanset, stetoskop və xalatı birinci kurs tələbəsinə təqdim edib.

Tədbir bədii hissə ilə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.