CƏMİYYƏT


Bu ilin “Könüllülər ili” elan olunması ölkə başçısının Azərbaycan gəncliyinə növbəti dəstəyidir

Bakı, 8 yanvar, AZƏRTAC

Ölkəmizdə 2020-ci ilin “Könüllülər ili” elan olunması Prezident İlham Əliyevin Azərbaycan gəncliyinə növbəti dəstəyini ehtiva edir. Könüllülük gənclərə bir neçə istiqamətdə böyük dividendlər qazandırır.

Bu sözləri AZƏRTAC-a Sosial Tədqiqatlar Mərkəzinin baş məsləhətçisi, politoloq Tural İsmayılov “Könüllülük ili”nin əhəmiyyətini şərh edərkən deyib.

Könüllülük hərəkatının Azərbaycanda geniş vüsət aldığını vurğulayan politoloq, gənclərin ölkəmizdə keçirilən beynəlxalq yarışlarda fəal iştirakına toxunaraq deyib: “Ölkəmizin ev sahibliyi etdiyi yarışlarda könüllülərin iştirakı onların dünyagörüşlərini zənginləşdirir, ölkəmizə gələn xarici idmançılar və mədəniyyət xadimləri ilə ünsiyyətini təmin edir, habelə karyera imkanlarını genişləndirir, bir sözlə, gənclər özlərini inkişaf etdirirlər. İkinci növbədə, könüllü gənclər müxtəlif qurumların tərkibində yaradılan könüllülük hərəkatlarında həmin sahənin spesifik xüsusiyyətlərini mənimsəyirlər. Onlar müxtəlif təlimlər, konfranslar, tədbirlər sayəsində gələcək həyatları üçün önəmli biliklər əldə edirlər. Daha sonra, könüllü gənclər gələcək kadr bazası üçün əvəzolunmaz simalara çevrilirlər. Onlar dövlətçilik və vətənpərvərlik ruhuna sadiq olurlar, idarəetmə, menecerlik və sair qabiliyyətlərini daha da təkmilləşdirirlər”.

Ekspert vurğulayıb ki, ötən illərdə Azərbaycan könüllü gəncləri yaddaqalan uğurlara imza atıblar. Könüllülük fəlsəfəsinin Azərbaycan modelinin dünyaya örnək olduğunu deyən T.İsmayılov qeyd edib ki, könüllülük bir çox fəaliyyət sahələrinə nüfuz edərək böyük bir hərəkat halını alıb, ölkəmizin hər bir bölgəsinə, ictimai həyatın müxtəlif sahələrinə nüfuz edib. “ASAN xidmət”, “Regional İnkişaf” İctimai Birliyi, “Bir” Tələbə könüllüləri, Miqrasiya könüllüləri, Diaspora könüllüləri, Gömrükçü könüllülər, Aqrar könüllüləri və digər bir çox könüllülər mərkəzi və yerli icra hakimiyyəti orqanlarında fəal iştirak edirlər. Könüllülərimiz ölkəmizdə Avroviziya Mahnı Müsabiqəsi, Birinci Avropa Oyunları, Formula 1 yarışları, IV İslam Həmrəyliyi Oyunları kimi irimiqyaslı beynəlxalq tədbirlərdə böyük əmək sərf edərək əvəzsiz rol oynayıblar”.

Könüllülük hərəkatından cəmiyyətin qazanclı olacağını vurğulayan Tural İsmayılov bildirib ki, ötən il könüllülər üçün uğurlu olub: “5 dekabr - Beynəlxalq Könüllülər Günü ilə əlaqədar ölkədə geniş təlimlər, konfranslar və tədbirlər keçirildi. 2019-cu ildə könüllü təşkilatlarını və hərəkatlarını, həmçinin Azərbaycanın şəhər və rayonlarını əhatə edən “Könüllülük həftəsi” çərçivəsində bir sıra tədbirlər təşkil olundu. Ümumilikdə “Azərbaycan könüllülük həftəsi”ndə ölkə üzrə 15 mindən çox gənc iştirak edib. Bütün bu göstəricilər Azərbaycan gəncliyinin yeni təşkilatlanmasının öz böyük uğurunu bir daha nümayiş etdirir”.

Politoloq əlavə edib ki, dövlətimizin başçısının 2020-ci ili “Könüllülər ili” elan etməsindən Azərbaycan gəncliyi, bütövlükdə ölkəmiz yararlanacaq: “Azərbaycanda gənclik enerjisi, insan kapitalı bütün sahələrə daha dərin inteqrasiya edəcək. Azərbaycan gənclərinin könüllülük sıralarında təmsil olunması ümumrespublika səviyyəsində daha da geniş vüsət alacaq”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.