MƏDƏNİYYƏT


Cəfər Namiq Kamalın 70 illiyinə həsr olunmuş “Tale yazısı” kitabının təqdimatı olub

Bakı, 17 yanvar, Məmməd Məmmədli, AZƏRTAC

Yanvarın 17-də Bakı Kitab Mərkəzində Xalq artisti Cəfər Namiq Kamalın 70 illiyinə həsr olunmuş “Tale yazısı” kitabının təqdimatı olub.

AZƏRTAC xəbər verir ki, “Apostrof-A” nəşriyyatında çap olunan kitabın müəllifi tanınmış teatrşünas və dramaturq Çingiz Ələsgərlidir.

Tədbirdə çıxış edən müəllif kitabda Cəfər Namiq Kamal yaradıcılığını araşdırmağa çalışdığını söyləyib: “O, 25 il Azərbaycan Dövlət Gənc Tamaşaçılar Teatrında aktyor kimi çalışaraq bənzərsiz obrazlar qalereyası yaradıb. Fəaliyyətini Akademik Milli Dram Teatrında davam etdirən aktyor ilk gündən yaratdığı obrazlarla diqqəti cəlb edib. Tamaşaçılar hər zaman Cəfər Namiq Kamalı səhnədə axtarır, onun obrazlarını gözləyir. Çalışmışam kitabda aktyorun portretini yaradım. Kitab aktyorla söhbətlərim əsasında qurulub və nəticədə səmimi bir mətn yaranıb”.

Çingiz Ələsgərli bildirib ki, kitabda, həmçinin aktyorun televiziya tamaşalarında yaratdığı obrazlar da öz əksini tapıb.

Tədbirdə çıxış edən Xalq artisti İlham Namiq Kamal deyib: “Bu kitab iki il bundan əvvəl nəşr olunmalı idi, təəssüf ki, koronavirus bizim planlarımızı pozdu. Kitabda Çingiz Ələsgərli Cəfərin ən kiçik rollardan tutmuş böyük rollarına qədər bütün yaradıcılığını tədqiq edib. Buna görə ona təşəkkürümü bildirirəm”.

Tanınmış teatrşünas, sənətşünaslıq üzrə fəlsəfə doktoru, Azərbaycan Dövlət Mədəniyyət və İncəsənət Universitetinin dosenti Vidadi Qafarov kitabla bağlı təəssüratlarını bölüşüb. Bildirib ki, sənət sahəsində belə kitabların çapı olduqca vacibdir, çünki teatrın inkişafına təkan verir. Cəfər Namiq Kamalın fərdi xüsusiyyətlərindən danışan V.Qafarov bildirib ki, kitab ömrünün yarıdan çoxunu sənətə həsr edən aktyorun portretini əks etdirir.

Akademik Milli Dram Teatrının aktrisası, Xalq artisti Bəsti Cəfərova deyib: “Cəfər Namiq Kamal 1996-cı ildən bizim teatra gələndən onunla müxtəlif obrazlar yaratdıq. Bizim ilk duetimiz İlyas Əfəndiyevin “Dəlilər və ağıllılar” pyesi əsasında hazırlanmış eyniadlı tamaşada oldu. Bu tamaşa 18 ildir ki, teatrın repertuarında yer alır. Bizim üçün böyük hadisədir ki, görkəmli aktyorumuz haqqında belə nəfis şəkildə kitab çap olunub. Bu münasibətlə onu təbrik edirəm”.

Xalq artisti Tariyel Qasımov Cəfər Namiq Kamal haqqında danışarkən bildirib ki, o, aktyor kimi necə aktyordursa insan kimi də elə insandır. Onun ucalığı səmimiliyindədir: “Bir teatrda işlədikdən sonra mən onu özümə ən yaxın dost hesab etmişəm”.

Təqdimat mərasimində Xalq artisti Ramiz Həsənoğlu, yazıçı-dramaturq Əli Əmirli və başaqları çıxış edərək kitabla bağlı fikirlərini bölüşüblər.

Qeyd edilib ki, kitabın redaktoru ssenarist və dramaturq Əhməd Orucoğlu, naşiri isə Akif Dənzizadədir. 304 səhifəlik kitabda Xalq artisti Cəfər Namiq Kamalın Azərbaycan Dövlət Gənc Tamaşaçılar və Azərbaycan Dövlət Akademik Milli Dram teatrlarının hər birində əsrin dörddə biri qədər davam etmiş maraqlı və zəngin yaradıcılığı ətraflı şəkildə araşdırılıb.

Kitabda maraqlı başlıqlar altında aktyorun bu gün də uğurla davam etdirilən zəngin yaradıcılıq təcrübələri, yaratdığı və ya müxtəlif səbəblərdən yaratmadığı obrazlar haqqında düşüncələri, mülahizələri, arzuları, başına gələn məzəli hadisələr, haqqında müxtəlif qəzetlərdə çap olunmuş resenziyalardan parçalar, fotolar və xatirələr toplanıb.

Diqqətə çatdırılıb ki, kitabın sonunda “Cəfər Namiq haqqında deyilənlər” bölümündə sənətkarın sənətkar qardaşı, “Şöhrət” ordenli, Xalq artisti, professor İlham Namiq Kamalın, Xalq yazıçısı, dramaturq Elçinin, Xalq artisti, rejissor Ramiz Həsənoğlunun, Xalq artisti Bəsti Cəfərovanın, ssenarist, rejissor Şərif Qurbanəliyevin, ssenarist, dramaturq Əhməd Orucoğlunun aktyor haqqında fikir və arzuları yer alıb.

Çıxışlarda kitabın geniş oxucu kütləsi, həmçinin aktyorluq, rejissorluq və teatrşünaslıq sahələri üzrə təhsil alan tələbələr üçün maraqlı olacağına əminik ifadə olunub.

Bütün iştirakçılara və çıxışçılara minnətdarlığını bildirən Cəfər Namiq Kamal bildirib ki, aktyor ömrü boyu müxtəlif səpgili obrazlara həyat verir. Tamaşaçılar hər zaman aktyorun özü ilə yox, onun obrazları ilə görüşürlər. Rejissor aktyorda itdiyi kimi, aktyor da obrazlarda itir, görünməz olur: “Mənə elə gəlir ki, aktyorun yaradıcılığı ilə bərabər şəxsi həyatı, sənət haqda düşüncələri, aktyorluq təcrübəsi, iş prosesi, dünya görüşü qələmə alınsa bədii əsər qədər maraqlı və oxunaqlı olar”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.