Bakı, 23 iyul, AZƏRTAC 

Nəsimi rayonu ərazisindəki Cəlil Məmmədquluzadə küçəsində alternativ salınmış müvəqqəti yolun çökmüş hissəsinin bərpası işləri qısa müddət ərzində yekunlaşdırılıb. Müvəqqəti alternativ yol artıq sürücülərin istifadəsinə verilib.

Bu barədə AZƏRTAC-a Avtomobil Yolları Dövlət Agentliyinin mətbuat xidmətindən bildirilib.

Məlumata əsasən, müvəqqəti alternativ yolun altında aşkarlanan və söküntüsü yarımçıq aparılmış binanın 2 mərtəbəli zirzəmisinin mərtəbələrarası hissəsi sökülüb, əks-dolğu işləri aparılıb. Daha sonra yeni yol yatağı və yol əsası inşa edilərək, asfaltlanma işləri görülüb.

Qeyd olunub ki, Nəsimi rayonu, Cəlil Məmmədquluzadə küçəsinə alternativ olaraq müvəqqəti salınmış yolda çökmüş ərazidə aparılan qazıntılar zamanı yol səthindən təqribən 5-6 metr dərinlikdə dəmir-beton konstruksiya aşkarlanıb. Araşdırma zamanı məlum olub ki, bu əvvəllər sözügedən ərazidə söküntüsü tam həyata keçirilməmiş və tökmə torpaqla örtülmüş çoxmərtəbəli binanın zirzəmi hissəsidir.

Şərti adı "B-04" olan metro stansiyasının tikinti ərazisi Cəlil Məmmədquluzadə küçəsinə düşdüyü üçün 2012-ci ildə küçənin sözügedən hissəsi hərəkət üçün bağlanaraq hasarlanıb. "Bakı Metropoliteni" QSC-nin sifarişi ilə boş ərazidə alternativ olaraq müvəqqəti yol salınıb.

Müvəqqəti yol hissəsi söküntüsü tam həyata keçirilməmiş, tökmə torpaqla örtülmüş çoxmərtəbəli binanın zirzəmisinin üzəri ilə çəkildiyindən və həmin zirzəminin 6-7 ildir ki, torpaq altında qalaraq korroziyaya uğramış mərtəbələrarası beton tavanı sındığı üçün müvəqqəti yolda çökmə baş verib.

Həmçinin nəzərə çatdırılıb ki, çökmə qeydə alınan hissə alternativ olaraq və müvəqqəti salındığı üçün Azərbaycan Avtomobil Yolları Dövlət Agentliyinin balansında deyil.