REGİONLAR
Cənub bölgəsində uşaqların bayram sevinci
Lənkəran-Cəlilabad-Masallı, 1 iyun, Bağır Əliyev, AZƏRTAC
1 İyun - Uşaqların Beynəlxalq Müdafiəsi Günü respublikamızın hər yerində olduğu kimi, ölkəmizin cənub bölgəsində də bayram sevinci ilə qeyd olunub.
Lənkəran Şəhər Mədəniyyət Mərkəzində keçirilən tədbirdə ümumtəhsil məktəblərinin müəllimləri, şagirdlər, məktəbəqədər təhsil müəssisələrinin rəhbərləri, tərbiyəçilər, uşaqlar və ictimaiyyət nümayəndələri iştirak ediblər.
AZƏRTAC xəbər verir ki, tədbir iştirakçıları Mərkəzin foyesində uşaqların əl işlərindən ibarət sərgi ilə tanış olub, ümummilli lider Heydər Əliyevin və Prezident İlham Əliyevin uşaqlarla görüşlərini əks etdirən videoçarxa baxıblar.
Rayonun ümumtəhsil və musiqi məktəblərinin, məktəbəqədər təhsil müəssisələrinin şagird və uşaq kollektivlərinin iştirakı ilə hazırlanmış bayram konserti tamaşaçılar tərəfindən razılıqla qarşılanıb.
X X X
1 İyun - Uşaqların Beynəlxalq Müdafiəsi Günü ilə əlaqədar “Kapital Bank” Lənkəranda “Nağıllara səyahət” adlı sosial layihənin təqdimatını keçirib.
AZƏRTAC xəbər verir ki, layihə çərçivəsində uşaqlar üçün pulsuz teatr tamaşaları nümayiş olunub.
Uşaqlar Lənkəran Dövlət Dram Teatrında Ələsgər Qurbanovun “Ceyranın ad günü” tamaşasına baxıblar.
Maraqla izlənilən səhnə əsərinin quruluşçu rejissoru Tərlan Abdullayev, quruluşçu rəssamı Tərlan Sadıqov, musiqi tərtibatçısı Fərahim Fərəcovdur.
Tamaşada rolları Əməkdar Artist Sücəddin Mirzəyev, aktyorlardan Qızılgül Quliyeva, Emin Fərzullayev, Səyyad Əliyev, Təranə Fərəcova, Şəbnəm Hüseynova, Günel Abbaszadə, Aysel Cahangirli və başqaları ifa ediblər.
“Kapital Bank” tərəfindən uşaqlara hədiyyələr verilib.
X X X
İyunun 1-də Cəlilabad şəhərindəki Heydər Əliyev Seyrəngahında Uşaqların Beynəlxalq Müdafiəsi Günü bayram coşqusu ilə qeyd olunub.
AZƏRTAC xəbər verir ki, bayram şənliyində çıxış edən Cəlilabad Rayon İcra Hakimiyyətinin başçısı Əziz Əzizov ölkəmizdə uşaqlara göstərilən dövlət qayğısından, uşaq problemlərinə diqqətin artırılmasından danışıb. Qeyd olunub ki, BMT Baş Assambleyası tərəfindən 1950-ci ildə keçirilən Qadınların Beynəlxalq Konfransında uşaq hüquqlarının təmin olunması ilə bağlı təkliflər səsləndirilib və 1 iyun tarixinin uşaqların beynəlxalq müdafiəsinə həsr edilməsi barədə qərar qəbul olunub. Bundan sonra iyunun 1-i Uşaqların Beynəlxalq Müdafiəsi Günü kimi tarixə düşüb. Dünyanın əksər ölkələrində olduğu kimi, bu əlamətdar gün Azərbaycanda da hər il qeyd olunur.
Cəlilabad Rayon Uşaq Yaradıcılıq Mərkəzinin bədii özfəaliyyət kollektivləri və uşaq bağçalarının şagirdləri maraqlı konsert proqramı ilə çıxış ediblər.
Tədbir bayram konserti ilə davam edib.
X X X
Masallı şəhərindəki “Viləş” uşaq bağçasında Uşaqların Beynəlxalq Müdafiəsi Günü ilə bağlı keçirilən tədbirdə rayonda fəaliyyət göstərən uşaq bağçalarının fidanları, tərbiyəçi-müəllimlər, valideynlər, ictimaiyyətin nümayəndələri iştirak ediblər.
AZƏRTAC xəbər verir ki, tədbirdə çıxış edən Masallı Rayon İcra Hakimiyyəti başçısının müavini Aybəniz Qafarova uşaqları əlamətdar gün münasibətilə təbrik edib.
Bildirilib ki, ümummilli lider Heydər Əliyev uşaqlara dövlət səviyyəsində qayğını həmişə diqqətdə saxlayırdı. Azərbaycan Respublikasının Prezidenti İlham Əliyev uşaqların sağlam və firavan böyüməsini, onların rifahının yüksəldilməsini dövlət siyasətinin başlıca vəzifələrindən biri kimi müəyyən edib. 2009-cu ilin “Uşaq ili” elan edilməsi də bu sahəyə diqqətdən xəbər verir.
Tədbir nağıl əsasında qurulmuş uşaqların maraqlı kompozisiyalarının nümayişi ilə davam etdirilib. Uşaqların nümayiş etdirdikləri nağıl qəhrəmanlarının personajları, şeirlər, mahnılar, rəqslər və səhnəciklər tədbir iştirakçılarında xoş əhval-ruhiyyə yaradıb.
Sonda uşaqlara hədiyyələr verilib.
X X X
İyunun 1-də Masallı şəhərindəki Gənclər Mərkəzində uşaqlar və yeniyetmələrin Uşaqların Beynəlxalq Müdafiəsi Gününə həsr olunmuş rəsm və əl işlərindən ibarət sərgi-müsabiqəsi keçirilib.
AZƏRTAC xəbər verir ki, sərginin açılış mərasimində çıxış edən Masallı Rayon Gənclər və İdman İdarəsinin rəisi Camal Manafov, Masallı Rayon Dövlət Rəsm Qalereyasının direktoru Tofiq Fərəcov, təhsil şöbəsinin metodisti Əyyar Bürhanov əlamətdar gün münasibətilə uşaqlara ən xoş arzularını çatdırıblar.
Rəsm sərgisi müsabiqəsində Böyük Xocavar kənd tam orta məktəbin şagirdi Fatimə Qəzənfərova, Musaküçə kənd tam orta məktəbin şagirdi Nəzrin Həmzalı, Böyük Xocavar kənd tam orta məktəbin şagirdi Qulam Cavadov müvafiq olaraq birinci, ikinci və üçüncü yerlərə layiq görülüblər.
Müsabiqədə fərqləndiyinə görə “Dəfinə” məktəb-liseyinin şagirdi Ləman Məmmədli, Yeddioymaq kənd 1 nömrəli tam orta məktəbin şagirdi Zabitə Quliyeva diplomlarla mükafatlandırılıblar.
Əl işləri sərgi-müsabiqəsində Ərkivan qəsəbə 1 nömrəli tam orta məktəbinin şagirdi Solmaz Abbasova, şəhər 2 nömrəli tam orta məktəbin şagirdi Nilufər Məmmədova, Musaküçə kənd tam orta məktəbin şagirdi Xəyalə Hüseynova fərqləniblər.
Qaliblərə diplom və xatirə hədiyyələri verilib.