AZƏRTAC-ın İTAR-TASS agentliyindən aldığı xəbərə görə, Dominikan Respublikası öz hərbi kontingentini İraqdan vaxtından əvvəl çıxarmaq haqqında qərar qəbul etmişdir.

Respublikanın silahlı qüvvələr naziri Xose Migel Soto Ximenes bildirmişdir ki, onun ölkəsinin əsgərləri İraqdan yaxın 15 gün ərzində çıxacaqlar. Prezident İpolito Mexia Dominges bu barədə siyasi qərar qəbul etmişdir.

Bu Karib hövzəsi ölkəsinin kontingenti İspaniyanın komandanlıq etdiyi “Plyus Ultra” briqadasına daxildir. Beləliklə, İspaniya, Honduras və Dominikan Respublikası öz kontingentlərini İraqdan çıxardıqdan sonra bu briqadanın tərkibində yalnız Salvador və Nikaraqua bölmələri qalacaqdır.