AZƏRTAC xəbər verir ki, aprelin 27-də Azərbaycan Dövlət İqtisad Universitetində bu ali məktəbin 75 illik yubileyinə həsr olunmuş yığıncaq keçirilmişdir.

Yığıncaqdan əvvəl iştirakçılar Fəxri xiyabana gələrək, xalqımızın ümummilli lideri Heydər Əliyevin əziz xatirəsini ehtiramla anmış, abidəsi önünə əklil qoymuşlar.

Onlar görkəmli oftalmoloq alim, akademik Zərifə xanım Əliyevanın da xatirəsini yad etmiş, məzarı üzərinə gül-çiçək düzmüşlər.

Milli Məclis deputatlarının, ayrı-ayrı ali məktəb rektorlarının və ictimaiyyət nümayəndələrinin iştirak etdikləri yığıncaqda təhsil naziri Misir Mərdanov respublikamızda təhsilin inkişafındakı xidmətlərinə görə universitetin bir qrup əməkdaşının “Tərəqqi” medalı ilə təltif olunması və fəxri adlara layiq görülməsi barədə dövlətimizin başçısı İlham Əliyevin Sərəncamlarını oxumuş, Azərbaycan Prezidentinin tapşırığı ilə “Tərəqqi” medallarını, “Əməkdar müəllim” fəxri adının vəsiqələrini onlara təqdim etmişdir. Bir qrup müəllimə isə Təhsil Nazirliyinin “Qabaqcıl təhsil işçisi” döş nişanı, Azərbaycan Həmkarlar İttifaqları Konfederasiyasının Fəxri fərmanları verilmişdir.

M.Mərdanov müstəqil dövlətimizin memarı və qurucusu Heydər Əliyevin təhsilimizin inkişafında, onun dünya təhsil sisteminə inteqrasiya olunmasında misilsiz xidmətlərini xatırlatmış, ulu öndərin siyasətinin Prezident İlham Əliyev tərəfindən uğurla davam etdirildiyini vurğulamışdır.

Nazir universitetin müəllim və tələbələrini yubiley münasibətilə təbrik etmiş, onlara uğurlar arzulamışdır.

Universitetin rektoru, Milli Məclisin elm və təhsil məsələləri daimi komissiyasının sədri, professor Şəmsəddin Hacıyev təhsilimizə göstərdiyi diqqətə görə Prezident İlham Əliyevə dərin minnətdarlığını bildirmişdir.

Rektor bu ali məktəbin tarixindən danışaraq demişdir ki, 1930–cu ildə əsası qoyulmuş təhsil ocağının sənaye, kənd təsərrüfatı, ticarət, statistika, maliyyə, vergi sistemi və s. sahələrin yüksək ixtisaslı kadrlarla təmin edilməsində mühüm rolu olmuşdur. Son illər universitetin maddi-texniki bazası xeyli möhkəmlənmiş, respublikanın Avropa təhsil məkanına qoşulması ilə əlaqədar tədris planları və proqramları müasir tələblərə uyğunlaşdırılmışdır və informasiya–kommunikasiya texnologiyaları geniş tətbiq olunur. Ölkəmizdə ilk dəfə burada “Magistr hazırlığı mərkəzi” yaradılmışdır.

Hazırda universitetin 14 fakültəsində 16 mindən artıq tələbə 13 istiqamətdə 55 ixtisas üzrə bakalavr, 9 istiqamətdə 47 ixtisas üzrə magistr pillələrində təhsil alır.

Sonra çıxış edən Milli Məclisin deputatları, parlamentin iqtisadi siyasət məsələləri daimi komissiyasının sədri, akademik Ziyad Səmədzadə, Azərbaycan Həmkarlar İttifaqları Konfederasiyasının sədri Səttar Mehbalıyev, Bakı Dövlət Universitetinin rektoru AMEA-nın müxbir üzvü Abel Məhərrəmov, habelə Azərbaycan Respublikasının Prezidenti yanında Dövlət İdarəçilik Akademiyasının rektoru, professor Seyfəddin Qəndilov, “Odlar Yurdu” Universitetinin rektoru, professor Əhməd Vəliyev və başqaları ölkəmizdə həyata keçirilən təhsil islahatlarının əhəmiyyətindən bəhs etmiş, əlamətdar yubiley münasibətilə universitetin müəllim və tələbələrinə xoş arzularını çatdırmışlar.

Yığıncaq iştirakçıları universitetin müasir tələblərə cavab verən tədris şəraiti ilə tanış olmuşlar.

Yubiley tədbiri tanınmış incəsənət ustalarının çıxışı ilə başa çatmışdır.