İQTİSADİYYAT


Daha 11 sahibkar və menecer beynəlxalq ixtisasartırma kursunu başa çatdırıb

Bakı, 14 aprel, AZƏRTAC

Azərbaycanın biznes ictimaiyyətində menecerlərin ixtisasının artırılması üzrə Almaniya-Azərbaycan birgə Proqramı çərçivəsində “İqtisadi kooperasiya” üzrə beynəlxalq ixtisasartırma kursu keçən sahibkar və menecerlərimiz təlimləri uğurla başa çatdırıb.

Kiçik və Orta Biznesin İnkişafı Agentliyindən (KOBİA) AZƏRTAC-a bildirilib ki, aqrar, İKT, dizayn, sığorta və digər sahələrdə fəaliyyət göstərən 11 sahibkar və menecerə onlayn formatda beynəlxalq sertifikatlar təqdim edilib.

Qeyd edək ki, fevral-aprel ayları ərzində sahibkar və menecerlər Almaniyanın tədris mərkəzlərinin ekspertləri tərəfindən keçirilən onlayn təlimlər zamanı menecment sahəsində beynəlxalq təcrübə barədə məlumatlandırılıb, bu sahədə praktiki vərdişlərə yiyələnib və onlara Almaniya şirkətləri ilə işgüzar əlaqələrin qurulmasında dəstək göstərilib. Pandemiya bitdikdən sonra kursu uğurla başa vurmuş sahibkar və menecerlərin Almaniyaya bir həftəlik səfərləri nəzərdə tutulur.

Məlumat üçün bildirək ki, sahibkar və menecerlərin ixtisasartırma kursu ilə bağlı xərclər Azərbaycan Respublikasının İqtisadiyyat Nazirliyi ilə Almaniyanın Federal İqtisadiyyat və Enerji Nazirliyi arasında imzalanmış anlaşma memorandumu ilə təsdiq olunmuş “Azərbaycanın biznes ictimaiyyətində menecerlərin ixtisasının artırılması üzrə Almaniya-Azərbaycan birgə Proqramı” çərçivəsində Almaniya tərəfindən qarşılanır. İndiyədək proqramdan 462 sahibkar və menecer yararlanıb. Pandemiya səbəbindən ixtisasartırma kursu onlayn formatda davam etdirilir. Daha çox sahibkar və menecerin beynəlxalq ixtisasartırma kursundan yararlanması üçün pandemiya dövrü ərzində kursa sənəd qəbulu ilboyu onlayn şəkildə davam etdiriləcək. Proqramda iştirak etmək istəyən sahibkar və menecerlər proqramın Azərbaycan üzrə əlaqələndiricisi olan Kiçik və Orta Biznesin İnkişafı Agentliyinə müraciət edə bilərlər. Ətraflı məlumat üçün - https://bit.ly/3ka0gex.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.