İQTİSADİYYAT
Davosda bir daha təsdiqlənən reallıq - Azərbaycan investisiya yatırmaq üçün etibarlı tərəfdaşdır
Bakı, 19 yanvar, AZƏRTAC
BMT-nin dünyada baş verənləri idarə etmək baxımından praktiki gücünün getdikcə zəifləməsi, effektivliyinin azalması Davos Forumunun aktuallığını və zəruriliyini artırır. Dövlətimizin başçısının da bu cür mötəbər tədbirə dəvət olunması və vacib şəxslərlə görüşü Azərbaycana olan marağın göstəricisidir. Qarşıdakı müddətdə də biz bunun müxtəlif istiqamətlər üzrə səmərəsini görəcəyik.
Bu fikirləri AZƏRTAC-a açıqlamasında iqtisadçı-ekspert Eldəniz Əmirov söyləyib.
Ekspert əminliyini bildirib ki, Azərbaycanın alternativ enerji mənbələrinə yatırılmalı olan investisiyanın həcminə, işğaldan azad olunmuş ərazilərdə reinteqrasiya prosesinin sürətləndirilməsinə, iqtisadiyyatın daha da inkişafına Davos Forumunun müsbət təsiri olacaq.
“Prezident İlham Əliyevin Davosda “CISCO” şirkətinin qlobal innovasiyalar üzrə vitse-prezidenti Qay Didrix ilə çox vacib görüşü oldu. Məlumdur ki, Azərbaycanda bütün sahələrdə səmərəliliyini yüksəltmək üçün mütləq şəkildə məhsuldarlığın artırılmasına böyük ehtiyac var. Məhsuldarlığın artırılması üçün də yeni innovativ texnologiyaların tətbiqi çox vacib məsələdir. Məsələyə bu kontekstdən yanaşsaq, Prezident İlham Əliyevlə Qay Didrix arasında olan görüş zamanı Azərbaycan su resurslarından istifadə olunmasında məhz “CISCO” şirkətinin texnologiyalarının tətbiqi məsələsi də vacib bir nüans idi. Çünki Azərbaycan Cənubi Qafqazda su ehtiyatlarının cəmi 10 faizinə sahibdir. Su ehtiyatlarının 62 faizi Gürcüstana, 28 faizi isə Ermənistana məxsusdur. Ona görə ölkədə su ehtiyatlarından daha səmərəli istifadəsi üçün müasir texnologiyaların tətbiqi vacibdir”, - deyə Eldəniz Əmirov vurğulayıb.
Onun sözlərinə görə, builki Davos Forumu “Parçalanmış dünyada əməkdaşlıq” mövzusunda qlobal dünyada mövcud olan mənzərəni ifadə edir. Artıq dünyanın aparıcı maliyyə qurumları, təsisatları 2023-cü ilin perspektivləri ilə bağlı ciddi narahatlıqlar ifadə edirlər. Qeyd edə bilərik ki, hər bir əməkdaşlıq, müzakirə, istər digər dövlət və hökumət başçıları, istərsə də aparıcı şirkətlərin rəhbərləri arasında olan danışıqlar ticarət dövriyyəsinin artırılmasında, iqtisadi əlaqələrinin qurulmasında, investisiyaların cəlb edilməsində çox böyük əhəmiyyət daşıyır.
O əlavə edib ki, Davos Forumu iqtisadi platforma olsa da, əslində, burada müəyyən siyasi maraqların güdüldüyü də istisna edilmir. Bu səbəbdən qeyd edə bilərik ki, Prezident İlham Əliyevin Forumda iştirakı Azərbaycan ilə Ermənistan arasında sülh müqaviləsinin imzalanmasına töhfəsini verə bilər. Həmçinin Forum sülhə gedən yolda maneə törətmək istəyən müəyyən qüvvələrə də bir siqnal olaraq bəd niyyətlərinin neytrallaşması üçün çox əhəmiyyətli tədbirdir. Eyni zamanda, dövlətimizin başçısı ilə görüşməyə can atan dünyanın aparıcı şirkətlərinin rəhbərlərinin sayı kifayət qədərdir. Davos Forumunda bir daha təsdiqləndi ki, Azərbaycan investisiya yatırmaq üçün etibarlı tərəfdaşdır. Sülh müqaviləsi imzalandıqdan sonra isə xarici investorların Azərbaycana axınında ciddi müsbət dinamika görəcəyik.