ELM VƏ TƏHSİL


Dəniz Akademiyasında yeni tədris ili başlayıb

Bakı, 15 sentyabr, AZƏRTAC

Sentyabrın 15-i ölkəmizdə Bilik Günü kimi qeyd olunur. Bu tarix Azərbaycanda fəaliyyət göstərən demək olar ki, bütün təhsil müəssisələrində yeni tədris ilinin ilk dərs günü hesab edilir. Azərbaycan Dövlət Dəniz Akademiyasında da bu gün ilk dərs günü keçirilib.

Akademiyadan AZƏRTAC-a bildirilib ki, əvvəlki illərdən fərqli olaraq ilk dəfə bu əlamətdar günü tələbə və müəllimlər kompüter monitorlarından izləyiblər. Koronavirus pandemiyasının yayılmasına qarşı tədbirlər planı ilə əlaqədar olaraq Nazirlər Kabinetinin müvafiq Qərarına əsasən, tədrislərinin 2, 3 və 4-cü ilində oxuyan tələbələr tədrisə distant formada başlayıblar.

Fənn müəllimləri akademiyanın auditoriyalarından “Microsoft Teams” platforması üzərindən tələbələrə ilk dərs gününün mövzularını izah ediblər. Proqramın imkanlarından istifadə edilərək tədris olunan fənlərə aid mühazirə materialları və digər dərs vəsaitləri tələbələrin ixtiyarına verilib. Həmçinin akademiyanın rəsmi internet səhifəsində (www.adda.edu.az) bütün kafedralar üzrə mühazirə və məşğələ materiallarının elektron variantı yerləşdirilib.

Koronavirus pandemiyası, dünyada olduğu kimi, ölkəmizdə də bütün sahələrə təsirsiz ötüşməyib. İnsanların kütləvi toplaşma məkanlarından biri də təhsil müəssisələridir. Bu səbəbdən ölkəmizdə bu virusun yayılmasının qarşısının alınması tədbirlərindən biri kimi mart ayından başlayaraq ölkənin bütün təhsil müəssisələrində təlim-tədris prosesinin məsafədən aparılması qərara alınıb.

2019/2020-ci tədris ilinin yaz semestrinin imtahan sessiyası da əvvəlki illərdən fərqli olaraq distant formada aparılıb. İmtahan sessiyasından əvvəl tələblərə həmin semestrdə tədris olunan bütün fənlərə dair mühazirələr, məşğələ və laboratoriya dərslərinin yerinə yetirilməsinə aid metodiki göstərişlər, slaydlar, videoçarxlar, sərbəst işlərin mövzuları, sillabuslar və ədəbiyyat siyahıları göndərilib.

İmtahan sessiyasının nəticələrinə görə, imtahanlara onlayn qoşulan 721 tələbədən 664 nəfəri müsbət qiymət alaraq sessiyanı uğurla başa vura bilib. Müəyyən səbəblərlə bağlı imtahanlara qoşula bilməyən və akademik borcları yaranmış tələbələr üçün isə avqust ayının sonundan başlayaraq borclarını ləğv etmək imkanı yaradılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.