Bakı, 4 oktyabr, AZƏRTAC

İtaliya və Bolqarıstan Azərbaycanın Avropa İttifaqına(Aİ) açılan qapısıdır. Bu iki ölkə ilə əlaqələrin yüksək səviyyədə olması ölkəmizin Avropa qitəsinə inteqrasiyasını sürətləndirir. Prezident İlham Əliyevin Bolqarıstana rəsmi səfəri məhsuldar və əhəmiyyətli, gündəliyi isə çox zəngin olub. Səfərin gündəliyi həm iki ölkə, həm də Avropa İttifaqı ilə münasibətlərin yeni müstəviyə çıxarılması baxımdan çox əhəmiyyətlidir. Dövlətimizin başçısının Bolqarıstana səfəri çərçivəsində Avropa Komissiyasının Prezidenti, Yunanıstanın, Rumıniyanın Baş nazirləri ilə bir daha görüşmək imkanı yarandı və bu gün regionumuzda sülhün təmin olunması üçün mühüm məsələlər müzakirə edildi.

Bu sözləri AZƏRTAC-a açıqlamasında Milli Məclisin deputatı Azər Badamov söyləyib.

O qeyd edib ki, Azərbaycan enerji resurslarının ixracının şaxələndirilməsi siyasəti bu gün Aİ üçün enerji təhlükəsizliyinin təmin edilməsində hava və su qədər vacib amilə çevrilib. Baş vermiş hadisələr fonunda Avropa İttifaqının 150 milyard kubmetr Rusiya qazından məhrum olduğu bir vəziyyətdə Azərbaycan 2,6 trilyon təsdiq olunmuş qaz ehtiyatları ilə Avropanın enerji bazarında yeni və alternativsiz mənbəyə çevrilib. Prezident İlham Əliyevin müəllifi olduğu Cənubi Qaz Dəhlizi və onun tərkib hissəsi olan TANAP və TAP layihələri Avropanın ümid yeridir. Bu gün müzakirə olunan mövzular arasında aktuallığı ilə seçilən məsələlərdən biri də perspektivdə TANAP-ın buraxılma gücünü 16 milyard kubmetrdən 32 milyard kubmetrə, TAP-ın ötürücülük qabiliyyətini isə 10 milyard kubmetrdən 20 milyard kubmetrə çatdırılması ilə bağlıdır. Oktyabrın 1-də açılışı olmuş Yunanıstan-Bolqarıstan Qaz İnterkonnektoru bu iki ölkənin boru xətlərini birləşdirməklə yanaşı, Mərkəzi, Şərqi və Cənubi Avropa ölkələrinə qədər uzanacaq. Bu Qaz İnterkonnektorunun buraxılma gücünü ilkin mərhələdə 3 milyard, perspektivdə isə 5 milyard kubmetrə çatdırmaq mümkün olacaq. Bolqarıstanın illik 3,5 milyard kubmetr qaz istehlakının 1 milyard kubmetri Azərbaycandan idxal olunmağa başlayıb. Bolqarıstana qonşu daha 3 ölkə - Macarıstan, Ruminiya və Slovakiya da Azərbaycan təbii qazını almaq istədiklərini bildirib və bu istiqamətdə müzakirələr aparılıb. Beləliklə, Azərbaycan Avropa qitəsi üçün vacib, əvəzolunmaz və etibarlı aktora çevrilməkdədir.

“Azərbaycan-Bolqarıstan münasibətləri qarşılıqlı hörmət və etimad əsasında formalaşaraq strateji tərəfdaşlıq münasibətlərinə yüksəlib. Prezident İlham Əliyevin 2015-ci ildə Sofiyaya səfəri çərçivəsində ölkələrimiz arasında imzalanmış Strateji tərəfdaşlıq haqqında Birgə Bəyannamə çox yüksək səviyyədə icra olunur. Bu gün ölkələrimiz arası əməkdaşlığımız siyasi, iqtisadi, mədəni, humanitar sahələri əhatə etməklə çoxşaxəli inkişaf edir. Bolqarıstanın Prezidenti Rumen Radevin qeyd etdiyi kimi, Azərbaycan etibarlı strateji tərəfdaşdır, dostdur. Ümumiyyətlə, Azərbaycan etibarlı tərəfdaş olması ilə bağlı dünyada imic qazanıb. Çünki “Əsrin müqaviləsi”nin imzalanmasından başlayaraq müstəqillik illərimizdə ölkəmiz imza atdığı bütün sənədlərin icrasına sadiq qalıb, razılaşmalarda hətta bir vergül dəyişikliyi də edilməyib. Bu baxımdan, dünya ölkələri Azərbaycanı öz imzasına sadiq ölkə və etibarlı tərəfdaş adlandırırlar”, - deyə Milli Məclisin deputatı vurğulayıb.

A.Badamov bildirib ki, Azərbaycan Avropa, o cümlədən Bolqarıstanla təkcə neft-qaz sahəsindəki əməkdaşlıqla kifayətlənmək fikrində deyil. Həm də ölkəmiz Avropaya elektrik enerjisi və qeyri-neft məhsullarını da çıxartmaq niyyətindədir. Prezident İlham Əliyevin Sofiyada bolqarıstanlı iş adamları ilə görüşməsi və ölkəmizin investisiya mühiti ilə bağlı məlumatlandırması, gələcəkdə bolqarıstanlı biznes strukturlarının Azərbaycana sərmayə qoyulmasına və müştərək müəssisələrin yaradılmasına yeni təkan verəcək.

“Ölkəmizin Bolqarıstanla ticarət dövriyyəsi sürətlə artır. Belə ki, dövriyyə 2021-ci ildə 73,6 milyon dollar olduğu halda, cari ilin sonunda bu rəqəm artaraq 80 milyon dolları keçib. Prezident İlham Əliyevin səfəri çərçivəsində Bolqarıstanın Prezidenti və Baş naziri ilə ölkələrimiz arasında iqtisadi-ticari, kənd təsərrüfat, İKT, mədəni, peyk, pilotsuz uçan aparatlar, turizm və digər sahələr üzrə əməkdaşlığın genişləndirilməsi istiqamətində yeni potensialların realizə edilməsi haqqında məsələlər də müzakirə olunub. Müzakirə olunan məsələlərdən biri də nəqliyyat sahəsində əməkdaşlığın genişləndirilməsidir. Son illər ölkəmizdə yenidən qurulmuş avtomobil və dəmir yolları, Beynəlxalq Ticarət Limanı Azərbaycanın tranzit imkanlarını genişləndirib. Belə ki, cari ildə ölkəmizin üzərindən daşınan tranzit yüklərinin həcmi 50 faiz çoxalıb. Bu gün müzakirə olunan Orta Dəhliz və onun tərkib hissəsi olan Zəngəzur dəhlizi qitələrarası daşımaların həyata keçirilməsi üçün ən səmərəli layihə olaraq dəyərləndirir. Zəngəzur dəhlizinin açılması Avropaya daşımaların təhlükəsizliyini təmin etməklə yanaşı, yeni beynəlxalq enerji layihələrinin icrasını da mümkün edəcək. Qeyd etmək olar ki, Zəngəzur dəhlizi üzərindən Avropanı daha böyük təbii qazla təmin etmək gücündə olan Cənub Qaz Dəhlizinə paralel yeni ixrac marşrutu yaratmaq və buna Xəzər hövzəsindəki qaz istehsalçılarını da cəlb etmək mümkündür. İnanırıq ki, bu layihə perspektivdə Avropa üçün çox vacib məsələyə çevriləcək”, - deyən deputat əlavə edib ki, Azərbaycanın Avropa İttifaqının iqtisadiyyatında rolu gündən-günə artır. Bu da ölkəmizin müstəqilliyinin möhkəmlənməsinə və inkişafına yeni üfüqlər açır.