Bakı, 11 oktyabr, AZƏRTAC

Artıq 30 ilə yaxındır ki, ATƏT-in Minsk qrupu çərçivəsində Ermənistan-Azərbaycan münaqişəsinin həlli ilə bağlı danışıqlar heç bir real nəticə vermədi və qrupun həmsədrləri bu illər ərzində öz fəaliyyətsizliyi və qətiyyətsizliyi ilə Ermənistanın maraqlarına xidmət edən status-kvonun hökm sürməsinə şərait yaratdılar.

Bunu AZƏRTAC-a açıqlamasında Milli Məclisin deputatı Kamran Bayramov bildirib.

Deputat deyib: “Həmsədrlər status-kvonun qəbuledilməz olduğunu bəyan etsə də, işğalçı Ermənistan ilə torpaqları işğala məruz qalan Azərbaycan arasında heç bir fərq qoymadılar, öz fəaliyyətsizliyi ilə cəbhədəki vəziyyəti daha da gərginləşdirdilər. Həmçinin işğalçı Ermənistanın ötən illərdə hücum və təxribat cəhdlərinə şərait yaratdılar. Bu hücum və təxribatlara Silahlı Qüvvələrimiz layiqli cavab versə də, düşmən ölkə bu il əvvəlcə Tovuz istiqamətindəki dövlət sərhədində hücuma cəhd etdi. Tovuzda məqsədinə çatmayan düşmənin növbəti hücumunu Qarabağ cəbhəsinə istiqamətləndirməsi, mülki əhalimizə qarşı yönəldilməsi xalqımızın və Ordumuzun səbrinin tükənməsi ilə nəticələndi və əks-hücum əməliyyatları başlandı”.

Kamran Bayramov qeyd edib ki, Prezident, Ali Baş Komandan İlham Əliyevin rəhbərliyi ilə Azərbaycan Ordusu 10 gün müddətində Ermənistanın 30 il ərzində havadarlarının dəstəyi ilə qurduğu ordusunun böyük bir hissəsini məhv etdi, Ermənistan rəhbərliyinin yalandan yaratdığı “məğlubedilməz erməni ordusu” mifini darmadağın etdi, illər boyu işğal altında qalan torpaqlarımızın əhəmiyyətli və strateji hissəsi azad olundu. İşğalçı dövlətin 190-dan artıq tankı, çoxsaylı artilleriya qurğusu, raket sistemləri, canlı qüvvəsi məhv edildi, düşmənin xeyli sayda hərbi texnikası, silah-sursatı ələ keçirildi.

“Hərbi əməliyyatlar nəticəsində illərlə hökm sürən status-kvo, nəhayət ki, dəyişdi. Bu da həm Ermənistana, həm də ATƏT-in Minsk qrupuna dərs oldu. İndi Ermənistan hərbi, siyasi və diplomatik sahələrdə uğursuzluqlarla üz-üzə qalıb. Ermənistanın baş naziri Paşinyan Azərbaycanı atəşi dayandırmağa və danışıqlara qayıtmağı təklif edir. Bu isə o deməkdir ki, Ermənistan məğlubiyyətlə razılaşıb və öz işğalçı siyasətinin əsirinə çevrilib”, - deyə deputat vurğulayıb.