CƏMİYYƏT
Deputat: Ölkəmizdə hər bir insanın dini-etiqad azadlığı təmin edilib
Bakı, 6 avqust, AZƏRTAC
Ölkəmiz 70 il Sovet İttifaqının tərkibində yaşamağa məcbur olduğu dövrdə xalqımız dini qadağalarla üzləşmişdi. Məscidlərin bağlanması ilə yanaşı, din xadimlərinin fəaliyyəti və dini ayinlərin icrası, həmçinin milli-mənəvi dəyərlərimizi və adətə-ənənələrimizi özündə əks etdirən milli bayramların keçirilməsi qadağan olunmuşdu. Amma müstəqilliyimizin bərpasından sonra yenidən azadlığa qovuşmuş xalqımız dini-mənəvi dəyərlərini özünə qaytardı. Bu onu göstərdi ki, sovet dövləti xalqı dini-mənəvi dəyərlərdən nə qədər uzaqlaşdırmağa çalışsa da, insanların öz kökünə bağlılığını heç bir qüvvə sarsıda bilmədi.
Bu fikirləri AZƏRTAC-a açıqlamasında Milli Məclisin deputatı Azər Badamov söyləyib.
Deputat qeyd edib ki, ümummilli lider Heydər Əliyevin hakimiyyətə qayıdışı müstəqil Azərbaycanda dini etiqad və vicdan azadlığının təmin edilməsinə, dövlət-din münasibətlərinin sivil prinsiplərə uyğun tənzimlənməsinə kömək oldu. Eyni zamanda, dini-mənəvi, əxlaqi-etik dəyərlərin ictimai münasibətlərin tərkib hissəsinə çevrilməsində yeni mərhələyə çevrildi. Ulu Öndər məscidlərin qapılarını xalqa açdı. Ölkədə yeni məscidlərin tikintisinə başlandı, dini-etiqad və vicdan azadlığının təmin edilməsinin hüquqi bazası yaradıldı.
Ümummilli Lider dini etiqad azadlığı və milli-mənəvi dəyərlərin qorunub saxlanılmasının təmin edilməsinə yüksək dəyər verərək deyirdi: “Xalqımızın çoxminillik tarixi var və çox əsrlərdir ki, İslam dininə itaət edirik. İslam dini bizim doğma dinimizdir. Xalqımızın milli-mənəvi dəyərləri, dinimizin adət-ənənələri və dəyərləri-hamısı birlikdə bizim milli sərvətimizdir. Biz fəxr edə bilərik ki, xalqımız çox dəyanətli xalqdır və zaman-zaman, əsrlər boyu cürbəcür məhrumiyyətlərə məruz qalaraq bütün bu adət-ənənələri unutmayıb. Nə vaxt ki, rəsmi dairələr bunu qadağan edib, yaxud da buna mənfi münasibət göstərib, insanlar bunu qəlbində, öz ailəsində, evində yaşadıblar. Hətta bizim bəzi fədakar insanlar bu adət-ənənələrimizi yaşatdıqlarına görə çox əziyyətlər çəkiblər, bəzən də məhrumiyyətlərə, cəzalara məhkum olublar”.
Azər Badamov vurğulayıb ki, ulu öndər Heydər Əliyev Azərbaycanda İslam dini ilə yanaşı, bütün digər dinlərin də nümayəndələrinin birgə yaşamasının vacibliyini qeyd edirdi. Dövlətin dəstəyi ilə müxtəlif dinlərə aid ibadət yerləri yenidən qurularaq dindarların istifadəsinə verildi, həm də müxtəlif dini icmaların fəaliyyəti üçün maddi dəstək göstərilməyə başlandı. Ümummilli Lider çıxışlarının birində demişdi: “İslam dini başqa dinlərə qarşı heç vaxt düşmən olmayıb. Çünki bu dinlərin hamısı Allahdan gəlir. Azərbaycanda müsəlmanlarla yanaşı, başqa dinlərə etiqad edən adamlar da yaşayır. Onlar da Azərbaycanın bərabərhüquqlu vətəndaşlarıdır. Çalışmalıyıq ki, dini, milli mənsubiyyətindən asılı olmayaraq, Azərbaycanın bütün vətəndaşları eyni hüquqlu olsunlar və onların hamısının birliyini, vəhdətini təşkil edək. Bu da Allah-Təalanın buyurduğu bizim yolumuzdur”.
Milli Məclisin deputatı bildirib ki, Ulu Öndərin əsasını qoyduğu dövlət-din münasibətləri Prezident İlham Əliyev tərəfindən uğurla davam etdirilir. Ölkə ərazisində dövlətin dəstəyi ilə 2200-dən çox məscid, 14 kilsə, 7 sinaqoq yenidən tikilərik istifadəyə verilib. Bu prosesə Heydər Əliyev Fondunun Prezidenti Mehriban xanım Əliyevanın böyük töhfəsi olub. Bu gün də Heydər Əliyev Fondunun dəstəyi ilə işğaldan azad olunmuş ərazilərdə məscidlər yenidən qurularaq bərpa edilir.
Ölkəmizdə hər bir insanın dini-etiqad azadlığı təmin edilib. Ana qanunumuz olan konstitusiyamızda da bu münasibətlər yüksək səviyyədə təsbit olunub. Belə ki, Konstitusiyamızın 18-ci maddəsində qeyd olunur ki, Azərbaycan Respublikasında din dövlətdən ayrıdır. Bütün dini etiqadlar qanun qarşısında bərabərdir. 48-ci maddədə isə hər kəsin dinə münasibətini müstəqil müəyyənləşdirmək, hər hansı dinə təkbaşına və ya başqaları ilə birlikdə etiqad etmək, yaxud heç bir dinə etiqad etməmək, dinə münasibəti ilə bağlı əqidəsini ifadə etmək və yaymaq hüququ təmin edilib.
“Azərbaycan hüquqi, dünyəvi dövlətdir, burada vətəndaşların inanclarına hörmətlə yanaşılır. Ölkəmizdə vicdan, etiqad azadlığına təminat verilir, hər bir vətəndaşın öz dini inancını yerinə yetirməsi üçün şərait yaradılır. Vətəndaşlar da dövlətin yaratdığı şəraiti yüksək qiymətləndirməli, milli dəyərlərimizi uca tutmalıdırlar. Dövlət-din münasibətləri də ölkəmizi yad radikal dini cərəyanlardan qorumalıdır. Radikal dini cərəyanların məqsədi ölkənin dövlətçilik sütunlarını zəiflətmək və xarici dairələrin maraqlarını ölkədə həyata keçirməkdən ibarətdir. Londonda səfirliyimizə qarşı vandalizm aktını həyata keçirən “Mehdinin xidmətçiləri”də belə radikal cərəyanlardandır. Xalqımız öz dininə, adət-ənənələrinə, milli-mənəvi dəyərlərinə sadiqdir. Təbii ki, dini tədbirlərdə bütün bu amilləri hər bir vətəndaş nəzərə almalı və qurulmuş sivil və dünyəvi müstəqil dövlətimizin möhkəmlənməsinə və inkişafına töhfə verməlidir”, - deyə deputat fikirlərini yekunlaşdırıb.