SİYASƏT
Deputat: Prezident İlham Əliyevin qubadlılılarla öz yurdlarında görüşü yaddaşlarda əbədi qalacaq
Bakı, 26 oktyabr, AZƏRTAC
Azərbaycan Prezidenti İlham Əliyev Vətən müharibəsinin gedişində qəhrəman Ordumuzun işğal altındakı şəhər və rayonlarımızı düşməndən bir-bir təmizlədikcə, xalqımıza müraciətlər edir, özünün rəsmi tviter səhifəsində Qələbə paylaşımları ilə insanları sevindirirdi. İkinci Qarabağ savaşının birinci ildönümü günlərində isə dövlətimizin başçısı yağı tapdağından qurtulan şəhər və rayonlarımıza gedir, oraya dəvət etdiyi keçmiş məcburi sakinlərlə görüşür, onlarla sevinc və fərəhini bölüşür.
Qubadlı rayon sakinləri ilə oktyabrın 25-də görüşü də artıq ənənə halını alan həmin tədbirlərin bir nümunəsi idi. Ölkə rəhbərinin bu görüşün əvvəlində “Qubadlıya xoş gəlmisiniz. Bu gün Qubadlı rayonunun tarixində əlamətdar və tarixi bir gündür. Düz bir il bundan əvvəl müzəffər Azərbaycan Ordusu Qubadlını erməni işğalından azad etmişdir və bundan sonra 25 oktyabr bizim tariximizdə əbədi Zəfər günü kimi qeyd ediləcək”, - deyərək bütün qubadlılılara, bütün Azərbaycan xalqına təbrikini çatdırması da möhtərəm Prezidentimizin illərlə gözlədiyi sevincin keçmiş məcburi köçkünlərlə bölüşməsi mərasimi kimi yaddaşlara əbədi yazıldı.
AZƏRTAC xəbər verir ki, bu fikirləri Milli Məclisin deputatı, YAP İdarə Heyətinin üzvü Rəşad Mahmudov söyləyib.
Rəşad Mahmudov deyib: “Prezident İlham Əliyev 18 il idi ki, bu günü gözləyirdi, bu günə addım-addım yaxınlaşırdı. Bu bəxtəvərliyi, bu xoşbəxtliyi xalqına yaşatmaq üçün nələr etmirdi, hansı fədakarlığı göstərmirdi, hansı maneələri, əngəlləri dəf etmirdi?! Bir tərəfdən ölkəmizin iqtisadi inkişafını şərtləndirən önəmli layihələr reallaşdırır, xalqımızın, o cümlədən erməni cəlladları tərəfindən doğma yurd-yuvalarından didərgin salınan məcburi köçkünlərin sosial şəraitlərini yaxşılaşdırmaq məqsədilə tədbirlər həyata keçirir, Silahlı Qüvvələrimizi mənəvi-psixoloji, döyüş ruhu, sosial, ictimai, texniki-təchizat, silah-sursat, peşəkarlıq sarıdan gücləndirir, digər yandan isə Azərbaycanın haqq səsini, ədalətli mövqeyini, Ermənistanın işğalçılıq siyasətini, faşist mahiyyətini beynəlxalq aləmə çatdırırdı”.
Deputat əlavə edib ki, İkinci Qarabağ müharibəsində Azərbaycanın tarixi Zəfər əldə etməsini şərtləndirən bütün bu amillər Prezident İlham Əliyevin fədakar fəaliyyətinin, müdrik siyasətinin məntiqi nəticəsi idi. Dövlətimizin başçısı da bu qələbənin qazanılacağına əminliyini daim ifadə edir, məcburi köçkünlərlə görüşlərində onların diqqətinə çatdırırdı. Sadəcə, ölkə rəhbərinin özü də vurğuladığı kimi, bu haqq mübarizəmizi silah gücünə deyil, sülh, əmin-amanlıq yolu ilə gerçəkləşdirməyə can atırdı, bu istiqamətdə istər düşmən tərəflə, istərsə də dünya gücləri, nüfuzlu beynəlxalq təşkilatlarla danışıqlar aparırdı. Təəssüf ki, torpaqlarımız işğal altında olduğu illər ərzində Ermənistan bu humanist səylərin mahiyyətini anlamadı. Şübhəsiz ki, dünya da bu haqsız, ədalətsiz davranışa susqunluqla yanaşdı, işğalçının mövqeyinin dəyişməsinə əsaslı təsir göstərmədi. Nəticədə isə Azərbaycanın səbir kasası daşdı, Ermənistanın sonsuz təxribatlarından, ölkəmizin yeni ərazilərini zəbt edəcəyi hədələrindən, necə deyərlər, cana yığıldı və beləliklə, ötən il sentyabr ayının 27-də düşmənin hücumuna əks-həmlə əməliyyatları ilə cavab verdi.
İkinci Qarabağ müharibəsi ilə Azərbaycan illərlə davam edən tarixi haqsızlığı aradan qaldırdı. Azərbaycan Ordusu başladığı 44 günlük Zəfər yürüşünü möhtəşəm bir sonluqla yekunlaşdırdı. Bu müharibədə ölkəmizi, onun rəhbəri cənab İlham Əliyevi ədalət uğrunda savaşdan çəkindirməyə cəhd göstərən dövlətlər də ortaya çıxdı. Lakin heç bir qüvvə xalqımızın, dövlət başçımızın qarşısını ala, sədd çəkə bilmədi.
Rəşad Mahmudov, həmçinin bildirib ki, Prezident İlham Əliyev müharibə davam etdiyi günlərdə, eləcə də parlaq Qələbəmizdən ötən müddətdə bütün görüşlərində, çıxışlarında Qarabağ həqiqətləri, Vətən müharibəsinin gedişi barədə dəfələrlə danışıb, diqqətçəkən bütün məsələlərə aydınlıq gətirib, xalqımızdan, beynəlxalq aləmdən heç nəyi gizlətməyib. Bu, təsadüfi olmayıb. Çünki Azərbaycan Prezidenti fəaliyyətində hər zaman müstəqil, açıq-aşkar siyasətə üstünlük verib, haqq-ədaləti müdafiə edib və bu yolda qəti mövqe sərgiləyib.
Prezident İlham Əliyevin və birinci xanım Mehriban Əliyevanın Qubadlı rayon ictimaiyyətinin nümayəndələri ilə görüşündə də dövlətimizin başçısının çıxışı bu baxımdan diqqət çəkdi. Ölkə rəhbəri İkinci Qarabağ müharibəsində hər bir yaşayış məntəqəsinin azad edilməsinin tarixi hadisə olduğunu qeyd edərək vurğuladı ki, döyüş zamanı Azərbaycan Ordusu ancaq irəli getdi. Savaşın ilk günündə 4 kəndin azad olunması xalqımıza çox böyük sevinc, fərəh yaşatdı. Bu, uzun illərdən sonra hamımızın səbirsizliklə gözlədiyi qələbə xoşbəxtliyi idi. Bununla belə o zaman heç kim müharibənin nə qədər davam edəcəyini deyə bilməzdi: “Çünki bizim planlarımız işğalda olan bütün torpaqları azad etmək idi. Ancaq bilmirdik, düşmən nə vaxt təslim olacaq. Halbuki müharibə zamanı mən dəfələrlə öz çıxışlarımda, xalqa müraciətlərimdə və xarici jurnalistlərə müsahibələrdə deyirdim ki, əgər düşmən bizə torpağımızdan çıxması ilə bağlı tarix versə, biz müharibəni dayandırmağa hazırıq və bu sözə də əməl etdik… Noyabrın 9-da artıq Ermənistan tərəfi də öz məğlubiyyətini qəbul edib, etiraf edib, bu məğlubiyyətlə barışıb və noyabrın 9-dan 10-na keçən gecə kapitulyasiya aktına imza atdı…”.
“Dövlətimizin başçısının Qubadlı rayon sakinləri ilə görüşündə vurğuladığı kimi, oktyabr ayının 25-də Qubadlının azad olunması Azərbaycanın Zəfər yürüşünü daha da sürətləndirdi. Laçın istiqamətində Silahlı Qüvvələrimizin yolu açıldı və bir neçə gündən sonra ordumuz Laçının cənub hissəsində yerləşən kəndləri işğalçılardan təmizlədi. Beləliklə, Laçın dəhlizi nəzarətə götürüldü və bununla da demək olar ki, müharibənin taleyi həll edildi. Artıq həm bütün dünya, həm də düşmən gördü ki, Azərbaycanın önündə heç bir qüvvə dayana bilməz. Bu qətiyyət, bu güc, bu xalq-ordu-Prezident vəhdəti sayəsində də Azərbaycan Zəfər yürüşünü, Zəfər missiyasını şərəflə davam etdirərək, Dövlət Bayrağını noyabrın 8-də Şuşada ucaltdı”, - deyə deputat fikirlərini yekunlaşdırıb.