CƏMİYYƏT
Diasporla İş üzrə Dövlət Komitəsi ilə Qarabağ Dirçəliş Fondu arasında Anlaşma Memorandumu imzalanıb
Bakı, 26 may, AZƏRTAC
Azərbaycan Respublikasının Diasporla İş üzrə Dövlət Komitəsi (DİDK) ilə Qarabağ Dirçəliş Fondu arasında əməkdaşlığa dair Anlaşma Memorandumu imzalanıb. Memorandumu Diasporla iş üzrə Dövlət Komitəsinin sədri Fuad Muradov və Qarabağ Dirçəliş Fondunun İdarə Heyətinin sədri Rəhman Hacıyev imzalayıblar.
DİDK-dan AZƏRTAC-a bildirilib ki, Anlaşma Memorandumunun əsas məqsədi əməkdaşlıq çərçivəsində birgə layihələr və tədbirlər həyata keçirməklə, işğaldan azad edilmiş ərazilərin yüksək rifaha malik regiona çevrilməsinə töhfə verməkdir. Sənəd xaricdə yaşayan azərbaycanlılar, diaspor təşkilatları və digər xalqların nümayəndələri tərəfindən erməni işğalı nəticəsində Azərbaycan xalqı üçün böyük əhəmiyyət kəsb edən mədəni irsə, təbii sərvətlər və bioloji tərəfdaşlığa vurulan zərər haqqında dünya ictimaiyyətinin məlumatlandırılmasını, Qarabağda həyata keçirilən tədbirlərin və investisiya potensialının dəstəklənməsi məqsədilə ianəçiliyi, dövlət-özəl tərəfdaşlığının təşviq edilməsini əhatə edir.
İmzalanma mərasimində çıxış edən Dövlət Komitəsinin sədri xarici ölkələrdə fəaliyyət göstərən Azərbaycan diaspor təşkilatlarının Qarabağda aparılan quruculuq işləri və Qarabağ Dirçəliş Fondunun fəaliyyəti barədə mütəmadi məlumatlandırılmasının vacibliyini vurğulayıb. Qeyd edilib ki, Anlaşma Memorandumunun əhatə etdiyi fəaliyyət istiqaməti Dünya Azərbaycanlılarının Şuşada keçirilmiş V Qurultayı zamanı müəyyənləşdirilən strategiyada da öz əksini tapıb. Təsadüfi deyil ki, Zəfər Qurultayının iki panelindən biri “Qarabağın bərpası və yenidən qurulmasında Azərbaycan diasporunun töhfələri” mövzusuna həsr olunub.
Qarabağ Dirçəliş Fondunun fəaliyyətə başladığı ilk gündən DİDK-dan dəstək gördüyünü deyən Rəhman Hacıyev Müzəffər Ali Baş Komandan, Prezident İlham Əliyevin təşəbbüsü ilə Azərbaycanın mədəniyyət paytaxtı Şuşada keçirilən Zəfər Qurultayında iştirakını və tədbir iştirakçıları ilə təmaslarını məmnunluqla xatırlayıb. O, eyni zamanda, diaspor təşkilatlarının Qarabağ Dirçəliş Fondu ilə səmərəli əməkdaşlıq edəcəyinə ümidvar olduğunu bildirib. Həmçinin Rəhman Hacıyev Fondun ötən ilin yekunlarına dair və cari fəaliyyəti barədə məlumat verib.
Sonra birgə əməkdaşlıq çərçivəsində görülməsi nəzərdə tutulan layihələr barədə ətraflı fikir mübadiləsi aparılıb. Tərəflər bu əməkdaşlığın işğaldan azad edilən ərazilərdə dayanıqlı məskunlaşmaya, əlverişli həyat şəraitinin yaradılmasına töhfə verəcəyinə əminliklərini ifadə ediblər.