DÜNYA


Dörd gənc Kopenhagendə Türkiyə səfirliyinə hücum etməkdə təqsirli bilinib

Stokholm, 21 fevral, AZƏRTAC 

Dörd gənc ötən ilin martında Kopenhagendə Türkiyə səfirliyinə Molotov kokteylləri ilə hücum etməkdə təqsirli bilinib.

AZƏRTAC Danimarka KİV-lərinə istinadla xəbər verir ki, 2018-ci il martın 19-da içərisinə benzin doldurulmuş əldəqayırma bombalarla Türkiyə səfirliyinə hücuma görə dörd kişiyə Kopenhagen şəhər məhkəməsinin qərarı ilə iş kəsilib.

İttihamlar cinayətkarlar tutulandan dərhal sonra – ötən ilin noyabrında irəli sürülüb.

Məhkəmə hazırda 19, 22, 23 və 24 yaşlarında olan gəncləri cinayət törətməkdə təqsirli bilib. Onların üçü bir il doqquz ay müddətinə, dördüncüsü ilyarım müddətinə həbs cəzasına məhkum edilib.

Bundan əlavə, məhkəmənin qərarı ilə onların dördü də gələcəkdə Danimarkadan deportasiya ediləcək və onlara 12 il ərzində ölkəyə gəlmək qadağan olunacaq.

Yerli KİV-lər yazır ki, məhkəmə prosesində iştirak edən bir neçə nəfər hökm oxunanda ağlamağa başlayıb.

Xatırladaq ki, cinayətkarlar səfirliyin binasına yeddi Molotov kokteyli atıblar. Xoşbəxtlikdən Danimarka paytaxtından şimalda – Hellerup qəsəbəsində yerləşən səfirlikdə insident zamanı heç kim olmayıb. Yanğın dərhal söndürülüb, bayır tərəfdən binaya cüzi ziyan dəyib.

Rauf Əliyev

AZƏRTAC-ın xüsusi müxbiri

Stokholm

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.