Naxçıvan, 15 yanvar, AZƏRTAC

Bu gün muxtar respublikada əhalinin, xüsusən də qadınların məşğulluğunun artırılması, əmək bazarının tələblərinə uyğun peşə hazırlıqlarının təşkili, özünüməşğulluq imkanlarının təmin edilməsi, innovasiyalar tətbiq olunan yeni iş yerlərinin yaradılmasına yönəldilmiş layihələr uğurla həyata keçirilir. Bu məqsədlə Naxçıvan Muxtar Respublikası Ali Məclisi Sədrinin 2016-cı il 11 yanvar tarixli Sərəncamı ilə təsdiq edilmiş “2016-2020-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı” qəbul olunub.

Üç yüzədək qadın peşə kurslarına cəlb edilib

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsindən AZƏRTAC-ın Naxçıvan bürosuna bildirilib ki, Dövlət Proqramının icrası ilə əlaqədar komitə tərəfindən xüsusi qayğıya ehtiyacı olan 296 nəfər qadın kompüter, bərbər-manikürçü, toxucu, xalçaçı, aşpaz, dayə, dərzi peşə kurslarına cəlb olunub və məlumatları aid dövlət orqanlarına göndərilib. Qadınların peşə kurslarına cəlb edilməsində məqsəd onların məşğulluğunun təmin edilməsi, müvafiq peşəyə yiyələnməsi, fiziki qüsurlu qadınların cəmiyyətə inteqrasiya olunmasıdır. Bu da sağlamlıq imkanları məhdud və sosial qayğıya ehtiyacı olan aztəminatlı ailələrə dövlət tərəfindən göstərilən diqqət və qayğının bariz nümunəsidir.

Uğurlu layihələrin uğurlu nəticələri

Qadınların dayanıqlı məşğulluqlarının təmin olunması məqsədilə Avropa İttifaqının maliyyələşdirdiyi, BMT-nin İnkişaf Proqramının qismən maliyyələşdirdiyi və icra etdiyi “Genderə həssas dayanıqlı inkişaf məqsədlərinin həyata keçirilməsində vətəndaş cəmiyyətinin rolunun artırılması” adlı genişmiqyaslı proqram çərçivəsində 2019-cu və 2020-ci illərdə Naxçıvan Muxtar Respublikasında “Qadınların dayanıqlı inkişaf üçün səlahiyyətləndirilməsi” layihəsi və “Naxçıvan Muxtar Respublikasında COVID-19-un təsirinə məruz qalmış qadınlara iqtisadi dəstək” layihəsi icra olunub. Layihə çərçivəsində maliyyə savadlılığı üzrə “Gələcəyini planlaşdır” və “Öz biznesinə başla və onu inkişaf etdir” adı altında 12 təlim keçirilib, təlimlərin sonunda uğurlu biznes planı ilə seçilən 102 qadına 69 min 250 manat məbləğində sərmayə kapitalı verilib. Sərmayə kapitallarının 53 min 600 manat məbləği, yəni 77,4 faizi ailə təsərrüfatlarının genişləndirilməsi və ya qurulması üçün, 15 min 650 manat məbləği, yəni 22,6 faizi isə digər sahələr üçün nəzərdə tutulub. Həmçinin “Qadınların dayanıqlı inkişaf üçün səlahiyyətləndirilməsi” layihəsinin yekun konfransında layihə iştirakçısı olan qadınların hazırladığı əl işlərindən və istehsal etdikləri məhsullardan ibarət sərgi-satış həyata keçirilib. Sərgidə 17 ailə təsərrüfatçısı olan qadınların 513 adda müxtəlif növdə ailə təsərrüfatı məhsulları və 19 istedadlı qadının 1119 adda əl işi və ailə təsərrüfatı məhsulları sərgilənib. Sərgi-satışda 15 ailə təsərrüfatçısı olan qadının 671 manat dəyərində 265 adda müxtəlif növdə ailə təsərrüfatı məhsulları və 9 istedadlı qadının 346 manat dəyərində 62 əl işi satılıb. Ümumilikdə isə sərgidə 24 qadının 1017 manat dəyərində 327 əl işi və istehsal etdiyi məhsulları satılaraq məbləği qadınlara ödənilib.

Sosialyönümlü layihələrin davamı olaraq Azərbaycan Mikromaliyyə Assosiasiyası və Azərbaycan Respublikası Sahibkarlar Təşkilatları Milli Konfederasiyası tərəfindən Avropa İttifaqının maliyyələşdirdiyi “Azərbaycan regionlarında dayanıqlı mikrosahibkarlığın inkişafının sürətləndirilməsi” (ADSMİRRA) layihəsi çərçivəsində Virtual Sahibkarlar Yarmarkası keçirilib. Muxtar respublikadan olan 32 istedadlı və ailə təsərrüfatçısı qadının 842 əl işi və ailə təsərrüfatı məhsulu yarmarkaya çıxarılıb və virtual yarmarkada 9 qadının 132 manat dəyərində 37 ailə təsərrüfatı məhsulu satılıb.

Əlavə olaraq, evdar qadınların özünüməşğulluğunu təmin etmək məqsədilə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsində maliyyə savadlılığı üzrə “Gələcəyini planlaşdır” təlimi keçirilib, təlimdə iştirak edən 30 nəfər qadına sertifikatlar təqdim olunub.

Rəsm və əl işlərindən ibarət 23 sərgi-satış və 5 festival keçirilib

Proqramın icrası ilə əlaqədar sağlamlıq imkanları məhdud və evdar qadınların məşğulluqlarını təmin etmək məqsədilə məhdud fiziki imkanlıların və istedadlı qadınların rəsm və əl işlərindən ibarət 23 sərgi-satış, 5 festival, 1 virtual yarmarka və 1 təlim keçirilib.

Ümumilikdə, Dövlət Proqramının icra müddətində 1269 şəxsin 56 min 86 manat dəyərində 6 min 235 adda əl işi və ailə təsərrüfatı məhsulları satılaraq, vəsaiti iş sahiblərinə ödənilib. Bu, bir tərəfdən qadınların özünüməşğulluğunun təmin edilməsidirsə, digər tərəfdən qadınlara göstərilən maddi dəstəkdir. Özünüməşğulluqla bağlı təşkil olunan tədbirlər qadınlarda özlərinə güvən hissini artırır, istedad və bacarıqları üzə çıxır və əldə olunan məvacib ailə büdcəsinin idarə olunmasında mühüm rol oynayır.

Qadınların ictimai fəallığı artır

Bu gün muxtar respublikada həyata keçirilən genişmiqyaslı infrastruktur layihələrinin davamlı şəkildə həyata keçirilməsi həm modernləşməyə, həm Naxçıvan qadınları üçün ictimai fəallığın artırılmasına, həm də bu sahədə yeni mərhələnin başlanmasına mühüm təkan verir.

Görülən işlər əminliklə deməyə əsas verir ki, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi bundan sonra da qadınların özünüməşğulluğunun təmin olunmasını diqqət mərkəzində saxlayacaq, qarşıya qoyulmuş vəzifələri layiqincə yerinə yetirəcək.