İmişli, 18 mart, Mahir Babayev, AZƏRTAC 

Prezident İlham Əliyevin tapşırıq və tövsiyəsinə əsasən mərkəzi icra hakimiyyəti orqanları rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həll olunması üçün müvafiq tədbirlər görürlər.

AZƏRTAC xəbər verir ki, Dövlət Sosial Müdafiə Fondunun sədri martın 18-də İmişli rayonundakı Heydər Əliyev Mərkəzində bu rayondan, eləcə də Saatlı, Sabirabad, Cəbrayıl, Beyləqan, Xocavənd və Füzuli rayonlarından olan 35-ə yaxın məcburi dövlət sosial sığorta ödəyicisi və pensiyaçını qəbul edib.

Qəbula gələn vətəndaşların müraciətləri əsasən sosial sığorta və pensiya təminatı, o cümlədən sosial sığorta stajının müəyyənləşdirilməsi, pensiyaların məbləğinin yenidən hesablanması, başqa dövlətlərin ərazisində qazanılmış iş müddətlərinin sığorta stajına daxil edilməsi, həmçinin əmək pensiyası növünün dəyişdirilməsi və digər məsələləri əhatə edib. Müraciətlərin bir neçəsi məcburi dövlət sosial sığorta haqları ilə bağlı olub.

Vətəndaşların qaldırdıqları bəzi məsələlər yerindəcə həllini tapıb, digərləri isə araşdırılması üçün qeydiyyata alınıb.

Sədr E.Mehdiyev müraciətlərdə qaldırılan bütün məsələlərin obyektiv və ədalətli şəkildə araşdırılaraq konkret tədbirlər görülməsi və nəticəsi barədə fondun rəhbərliyinə və vətəndaşlara məlumat verilməsi barədə aidiyyəti strukturların rəhbərlərinə göstəriş verib.

Qəbul zamanı fondun səlahiyyətlərinə aid olmayan müraciətlər də qeydə alınaraq müvafiq orqanlara çatdırılmaq məqsədilə nəzarətə götürülüb.