Bakı, 5 avqust, AZƏRTAC

Rusiya Federasiyası sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin avqustun 3-də səhər saatlarında Laçın rayonu istiqamətində yerləşən Azərbaycan Ordusunun bölmələrinin mövqelərinin intensiv atəşə tutması vəziyyəti qəsdən gərginləşdirmək cəhdidir. Ermənistan çalışır ki, bu cür təxribatlar törətməklə Azərbaycanı da cavab tədbirləri görməyə təhrik etsin və gərginliyin miqyasını artırmaqla ölkəmizi günahlandırsın. Digər tərəfdən, Ermənistanın bu təxribatları Rusiya sülhməramlılarına qarşı yönəlib. Ermənilər bu yolla Rusiya sülhməramlılarının öz vəzifələrinin öhdəsindən gələ bilmədiyini, onların missiyasının uğursuz olduğunu göstərməyə çalışırlar. Bu qanlı insident bir daha Ermənistanın üçtərəfli razılaşmanı kobud şəkildə pozduğunu, eyni zamanda, iki dövlət arasında münasibətlərin normallaşması istiqamətində səylərə xələl gətirdiyini nümayiş etdirir.

Bunu AZƏRTAC-a açıqlamasında Milli Məclisin deputatı Anar Məmmədov söyləyib.

A.Məmmədov bildirib ki, əsgərimizin şəhid olmasından sonra qalib Azərbaycan Ordusu qanunsuz erməni dəstələrinə qarşı uğurlu “Qisas” əməliyyatı həyata keçirdi, düşmənə sarsıdıcı zərbə vuraraq onun çirkin niyyətinin qarşısını sərt şəkildə aldı.

Ordumuzun həyata keçirdiyi bu əməliyyat regionda sülhün və təhlükəsizliyin təmin olunmasına xidmət edir. Lakin görünən odur ki, Ermənistan rəhbərliyi 44 günlük müharibəyə qədər dövrdə olduğu kimi, bu dəfə də təxribatlara əl ataraq, kimlərinsə onları qoruyacağına ümid edir. Ermənistan rəsmiləri bununla 30 il bundan əvvəl olduğu kimi, hələ də xəyallarla yaşadıqlarını və bölgədə mövcud olan yeni reallıqdan nəticə çıxarmadıqlarını göstərirlər. Ermənistan tərəfi, əslində, vəziyyəti gərginləşdirməklə özünü daha ağır duruma salır. Bundan əvvəlki təxribatların nəticələri hər kəsə məlumdur.

Onun sözlərinə görə, Ermənistan müharibədən sonra həyata keçirdiyi təxribatların nəticələrini, 2020-ci ilin dekabrında Azərbaycanın həyata keçirdiyi antiterror əməliyyatını unutmamalıdır.

Azərbaycan dəfələrlə bəyan edib ki, müharibədən sonra regionda yeni vəziyyət yaranıb və Ermənistan da yeni yaranmış vəziyyətdə əməkdaşlıqdan faydalana bilər. Lakin Ermənistan tərəfi yeni yaranmış əməkdaşlıq mühitindən faydalanaraq ölkədə mövcud olan böhrandan çıxmaq əvəzinə növbəti təxribatlara əl atır. Bu, bir daha Ermənistanın sülh və əməkdaşlıq tərəfdarı olmadığını göstərir. Lakin əminliklə qeyd etməliyik ki, indiyə qədər olduğu kimi, bundan sonra da Azərbaycan tarixi məqsədlərinə çatacaq, Ermənistan rəsmi Bakının tələblərini yerinə yetirəcək.

Deputat sonda Prezident İlham Əliyevin bu sözlərini xatırladıb: “Müharibə onların yadından çıxmasın. Unutmasınlar ki, dəmir yumruq yerindədir. Biz xəbərdarlıq edirik, əgər belə təxribat xarakterli addımlar atılacaqsa, Ermənistan daha da peşman olacaq".