Federasiya Kubokunun Gəncədə keçirilən birinci mərhələsi başa çatıb

Gəncə, 12 mart, AZƏRTAC

Azərbaycan Velosiped Federasiyasının təşkilatçılığı ilə Gəncədə keçirilən şose velosipedi üzrə Federasiya Kubokunun birinci mərhələsi başa çatıb.

AZƏRTAC-ın bölgə müxbiri xəbər verir ki, martın 12-də idmançılar qrup ötüşməsində güclərini sınayıblar. Otuz velosipedçinin qatıldığı mübarizəyə Heydər Əliyev Parkının önündən start verilib.

Beynəlxalq Velosipedçilər İttifaqının (UCI) mövcud qaydalarına əsasən keçirilən yarışda Elit/U23 yaş kateqoriyasında kişilər və gənc oğlanlar Gəncə şəhərində təyin olunmuş marşrut üzrə 5 dairəni tamamladıqdan sonra dağ yolları ilə ümumilikdə 72 kilometr, yeniyetmə oğlanlar və qadınlar isə startdan sonra birbaşa dağ yolları ilə 42 kilometr məsafə qət edərək Hacıkənd qəsəbəsində finiş xəttini keçiblər.

Elit/U23 yaş kateqoriyasında kişilər və gənc oğlanlar arasında Mikayıl Səfərli (ROEQİUGVM, 02:00:15) bütün rəqiblərini qabaqlayaraq finişə birinci çatıb. Əli Qurbanov (Sakarya BB Pro Team, 02:00:44) ikinci, Nəcəf Bağırov (ROEQİUGVM, 02:01:01) isə üçüncü yerlə kifayətləniblər.

Yeniyetmə oğlanların mübarizəsində ən yaxşı nəticəyə Artyom Proskuryakov (Təhsil RİM, 01:23:56) imza ataraq qızıl medal qazanıb. Ravi Rzayev (ROEQİUGVM, 01:26:04) gümüş, Rəşad Əliyev (Təhsil RİM, 01:31:52) bürünc medala sahib olublar.

Qadınların yarışında Viktoriya Sidorenko (ROEQİUGVM, 01:38:32) birinci yerə layiq görülüb. Onun ən yaxın izləyicisi Ayan Məmmədzadə (Təhsil RİM, 01:39:17) ikinci, Məryəm Əfqanzadə (ROEQİUGVM, 01:39:45) isə üçüncü yerdə qərarlaşıblar.

Yarışdan sonra mükafatlandırma mərasimi keçirilib. Qaliblər medal, diplom və qiymətli hədiyyələrlə təltif olunublar.

Xatırladaq ki, Federasiya Kubokunun birinci mərhələsinin ilk günündə velosipedçilər kriterium yarışında mübarizə aparıblar.