İDMAN


Fərhad İsmayılov: Stolüstü tennisçilərimizdən İslamiadada uğurlu nəticələr gözləyirik

Bakı, 31 iyul, AZƏRTAC

Stolüstü tennisçilərimiz Türkiyənin Konya şəhərində keçiriləcək İslam Həmrəyliyi Oyunlarına hazırlığı yekunlaşdırmaq üzrədir. Seçmə komanda iyulun 21-də Qax Olimpiya İdman Kompleksində başlanan təlim-məşq toplanışını da başa vurub. Baş məşqçi Mixail Timofeyev və böyük məşqçi Fərhad İsmayılovun rəhbərliyi altında keçirilən hazırlıq prosesində 10 idmançı iştirak edib.

AZƏRTAC xəbər verir ki, komandanın böyük məşqçisi Fərhad İsmayılov sonuncu təlim-məşq toplanışını qiymətləndirərkən deyib: “İlin əvvəlindən İslam Həmrəyliyi Oyunlarına ciddi hazırlaşırıq. Bunadək həm ölkə daxilində, həm də Türkiyədə toplanışlarda olmuşuq. Növbəti təlim-məşq toplanışını da uğurla başa vurduq. Qax Olimpiya İdman Kompleksində keçirilən hazırlıq prosesində əsasən taktiki və texniki çalışmalara üstünlük verdik. İdmançılarımız 10 gün davam edən məşqlərdə böyük həvəslə iştirak etdilər. Komandanın əhval-ruhiyyəsi yüksək səviyyədədir. Demək olar ki, yarışa tam hazırıq. Avqustun 5-də Konya şəhərinə yola düşəcəyik. Bu tarixədək Bakıda hazırlığın “son akkordları vurulacaq”. İslamiadada komandamızdan uğurlu nəticələr gözləyirik. Ümid edirəm ki, tennisçilərimiz onlara bəslənən etimadı doğruldacaqlar”.

Qeyd edək ki, İslam Həmrəyliyi Oyunlarında Vəzir Allahverdiyev, Nihad Məmmədov, Emin Məmmədov, Adil Əhmədzadə, Nəzakət Qarayeva, Ləman Abdulhəmidova, Zemfira Mikayılova və Mərziyyə Nurmətova bacarığını göstərəcək. Beynəlxalq dərəcəli hakim Zaur Mikayılov isə görüşləri idarə edəcək.

Stolüstü tennisçilərin İslam Həmrəyliyi Oyunlarında mübarizəsinə avqustun 7-də start veriləcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.