Bakı, 24 sentyabr, AZƏRTAC

Fidan Hacıyeva Musiqi Mərkəzində bu sənət ocağının tələbələrinin konserti və Xalq Artisti F.Hacıyevanın rol aldığı "Xınayaxdı gecəsi" filminin təqdimatı keçirilib.

AZƏRTAC xəbər verir ki, Musiqi Mərkəzinin tələbləri Azərbaycan və xarici ölkə bəstəkarlarının əsərlərini səsləndiriblər.

Həmişə arzum olub ki, ikinci, üçüncü, dördüncü, beşinci Karmen olsun

Fidan xanım ecazkar ifası ilə yanaşı, həm də yaxşı həmsöhbət olması, səmimiyyəti ilə hər kəsdə rəğbət oyadır. O, konsertdən əvvəl jurnalistlərlə söhbətində diqqətə çatdırır ki, dünyanın ən məşhur opera ifaçılarının, məsələn Bruno Balioni və digər sənətkarların öz musiqi mərkəzləri var. "Həmişə arzum olub ki, ikinci, üçüncü, dördüncü, beşinci Karmen olsun, ya da Müslüm Maqomayevlər, Bülbüllər yetişsin", - deyə Xalq Artisti arzularını bizimlə bölüşür.

Qeyd edək ki, böyük zəhmətlə ərsəyə gətirdiyi Musiqi Mərkəzinin yerləşdiyi evdə görkəmli müğənni doqquz il yaşayıb. Mərkəzin hər guşəsi özünü sənətə həsr edən F.Hacıyevanın musiqi aurasını əks etdirir: not şəklində pəncərə çərçivəsindən tutmuş, suvenirlərə, fotoşəkillərə və burada hökm sürən yaradıcı mühitədək.

Xatırladaq ki, bu ilin iyun ayında Musiqi Mərkəzinin fəaliyyətə başlamasının bir illiyi münasibətilə sənət ocağının tələbələrinin Rəşid Behbudov adına Dövlət Mahnı Teatrında hesabat konserti olmuşdu.

Sürpriz ifalarla dolu konsert

Leyla Qürbətlinin ifasında "Ave Maria" ilə başlanan budəfəki konsert də tamaşaçılara xoş anlar yaşadıb. Bu zərif qız "Testene Art Baku" müsabiqəsində üçüncü yeri tutub. Bakı məktəblərindən çoxlu sayda şagirdin qatıldığı müsabiqədə ən balaca iştirakçı Leyla olub.

Bir ilə yaxındır Musiqi Mərkəzində təhsil alan Orxan Cabbarov isə konsertdə "Sevgili canan" romansını şövqlə səsləndirib.

Tamaşaçılar qarşısına çıxan Sevil Əsədullayeva 2016-cı ilin dekabrında keçirilmiş, ideyası Heydər Əliyev Fondunun vitse-prezidenti Leyla Əliyevanın övladları Əli və Mikayıla məxsus "Zima" festivalının iştirakçısı olub. Qeyd edək ki, bu festivalın iştirakçıları müsabiqə əsasında seçilmişdi.

Musiqi Mərkəzinin direktoru – Fidan Hacıyevanın tələbəsi Elçin Əliyevin və Arzu Qurbanovanın "Arşın mal alan" operettasından dueti konsertin yaddaqalan anlarından biri olub. Nəhayət, səhnəyə balaca Karmen - Nəzrin Həsənzadə çıxıb. O, Gürcüstanda "Salyut talantov" festivalında səksən iştirakçı arasında birinci yeri tutub. Nəzrin deyir ki, münsiflər heyəti onun həm ifasını, həm obrazı yaratmaq bacarığını, həm də kostyumunu çox bəyənib. Musiqi Mərkəzində ona balaca Fidan da deyirlər.

Tamaşaçılar qarşısına çıxan şotlandiyalı Bob Petri də F.Hacıyevadan vokal dərsləri alır. O, Musiqi Mərkəzinin tədbirlərində iki dəfə çıxış edib. Bob Petri deyir ki, uşaqlıqdan səhnələrdə çıxış etmək arzusu olub. Fidan xanımı tanıyandan sonra bu arzu reallaşıb. İfa etdiyi mahnılara qəlbini qoyan Bob Petri bir daha tamaşaçılara sevgi dolu anlar yaşatdı.

Əli Abdullayev "O sole mio" mahnısını ifa edib. Bu balaca oğlan Yeni il ərəfəsində "Zima" festivalında iştirak edəcək.

Müslüm Maqomayevin "Azərbaycan" mahnısını oxuyan Bakı Dövlət Universitetinin tələbəsi Ariz Nəbiyev öz ifası ilə həm istedadını, həm də Fidan xanımın zəhmətinin hədər getmədiyini bir daha təsdiqləyib.

Konsertdən əvvəl Musiqi Mərkəzinin direktoru Elçin Əliyevin dediyi kimi, konsert, həqiqətən də, sürpriz ifalarla dolu idi.

Ana qayğısı, müəllim tələbkarlığı, tələbə sədaqəti

F.Hacıyeva tələbələri üçün həm tələbkar müəllim, həm də onların uğurlarına sevinən bir anadır. Bunu hər an görmək mümkündür: Musiqi Mərkəzinin konsert zalında stolun üstündə tələbələrinin uğurlarını əks etdirən diplomlar, fəxri fərmanlar düzülüb. O, eyni zamanda, tələbələrinin hər ifasını ciddi olaraq izləyir. Budəfəki konsertdə də belə oldu. Fidan xanım nəinki onları dinlədi, əyləşdiyi yerdəcə tələbələri ilə birgə oxudu, onların keçirdiyi həyəcanlı anlara ecazkar ifası ilə qoşuldu. Nəzrin Həsənzadənin çıxışında isə ayağa qalxıb onunla birgə oxuyaraq tələbəsini dəstəklədi.

Üzeyir Hacıbəyli adına Bakı Musiqi Akademiyasının solo oxuma (vokal) fakültəsində Hüseyn Əliyevin sinfində təhsil almış F.Hacıyeva bu gün də özünü onun tələbəsi hesab edir. “Məni bu sənətə gətirən o insana həyatım boyu borcluyam. Sənətdə atdığım hər bir addımda mənə kömək edib, səhnəyə çıxmağımda rejissor kimi, vokal ifada müəllim kimi”, - söyləyən Xalq Artisti onunla birgə fotoşəklini zalın görkəmli yerində divardan asıb. Yeri gəlmişkən, müğənni üçün ən əziz fotoşəkil isə onun dünya şöhrətli müğənni və bəstəkar Müslüm Maqomayevlə çəkdirdiyi fotodur. O, M.Maqomayevin ömür-gün yoldaşı Tamara Sinyavskayanın vaxtilə söylədiyi "Siz böyük ulduz ola bilərsiniz" sözlərini də unutmur.

Bu gün F.Hacıyevanın tələbləri də ona sədaqətlidir. Konsertdən əvvəl Elçin Əliyev etiraf etdi ki, hər ifaçı sənətin sirlərini gənc nəslə öyrətməyə can atmır, gənclərə bəzən qısqanclıqla yanaşanlar da olur. Lakin F.Hacıyeva tələbələrindən heç nəyi əsirgəmir. E.Əliyev Musiqi Mərkəzinin gələcəkdə akademiya səviyyəsinə yüksələcəyinə, yeni-yeni istedadları üzə çıxaracağına inanır.

"Xınayaxdı gecəsi" filmi dünyaya pəncərə açır

Tədbirdə F.Hacıyevanın çəkildiyi “Xınayaxdı gecəsi” filminin təqdimatı da keçirilib. Filmin rejissoru Nail Naiboğlu, ssenari müəllifi Nazilə Səfərlidir. Azərbaycan adət-ənənələrinin əks etdirildiyi bu film təkcə ölkəmizdə deyil, xaricdə də nümayiş olunacaq. Ekran əsərində F.Hacıyeva milli musiqi əsərlərimizi ingilis dilində ifa edir. Nazilə Səfərli isə “Arşın mal alan” operettasından “Gözəlim, yar gözəlim” mahnısını səsləndirib. Filmdə rejissor işini də vurğulamaq yerinə düşər. İyirmi dəqiqəlik film adət-ənənələrimizi dolğun əks etdirir, tamaşaçını bir qədər Novruz bayramına aparır. Filmi Azərbaycan mədəniyyətinin təbliği işinə töhfə kimi qiymətləndirmək olar. F.Hacıyeva deyir: “Xınayaxdı analoqu olmayan bir ənənədir. Çalışdıq ki, hər bir detalı o filmdə göstərək. Dünyanın bir çox məşhur müğənniləri bizim naxışlardan istifadə edirlər. Çalışdıq ki, həmin naxışların, xonçaların xalqımıza məxsus olduğunu göstərək. Filmin ərsəyə gəlməsində bir çox işlər görüldü. Nazilə xanım öz ifası ilə istedadının yeni bir tərəfini üzə çıxardı. Bu layihəni Fransadakı Azərbaycan Evinə Mirvari Fətəliyevaya təqdim etmişik. O, bunu çox bəyənib və öz səhifəsində paylaşıb. Biz adət-ənənələrimizin təbliğini davam etdirəcəyik”.

Nazilə Səfərli isə qeyd edir ki, sovet dövründə adət-ənənələr, o cümlədən xınayaxdı mərasimi bir növ yasaq edilsə də, yerli əhali bunu davam etdirib. “Xınayaxdı gecəsi” filmi dünyaya pəncərə açır.