Amerikanın “Foreign Policy News” xəbər portalında beynəlxalq münasibətlər sahəsində ekspert Piter Teyzin “Ordubad Avrasiyanın mərkəzində yerləşən qədim şəhərdir” adlı məqaləsi dərc edilib (http://foreignpolicynews.org/2014/10/17/ordubad-ancient-city-heart-eurasia/).

Oktyabr ayının əvvəlində Bakı Beynəlxalq Humanitar forumunda iştirak etmiş P.Teyz Ordubadın tarixini və mədəniyyətini təsvir edir. Bu məqaləni Azərbaycan xalqının ümummilli lideri Heydər Əliyevin doğulduğu Naxçıvana həsr etmiş müəllif region sakinlərinin qonaqpərvərliyi, burada gördüyü səmimiyyət və Naxçıvan dağlarının gözəl mənzərələri haqda yazır.

P.Teyz daha sonra Ordubaddakı tarixi Qeysəriyyə abidəsi, onun tarix muzeyinə çevrilməsi barədə məlumat verir.

Müəllif qeyd edir ki, Ordubadın adına ilk dəfə bizim eranın V əsrinə aid tarixi mənbələrdə rast gəlmək olar. Gəmiqaya petroqlifləri bu regionda eramızdan əvvəl VII-I əsrlərdə yaşamış insanların həyat tərzinin və mədəni inkişafının göstəricisidir. Ordubad, Sabirkənd, Plovdağ və Xaraba Gilandakı nekropollar regionun qədimliyinə dəlalət edir.

Amerikalı ekspert Ordubadın tarixinin müxtəlif dövrlərindən, o cümlədən bu diyarın Səfəvilər, Osmanlı və İran imperiyalarının tərkibində olduğu dövrlərdən söhbət açaraq qeyd edir ki, XX əsrin əvvəlində Ordubadın minlərlə sakini erməni terrorizminin qurbanı olub.

Ordubad Yaxın Şərq ilə Şərqi Asiya arasında mühüm ticarət yollarının qovuşduğu məkanda yerləşir. XVI əsrdən başlayaraq Venesiya, Marsel, Amsterdam və digər Avropa şəhərlərinə ixrac edilən Ordubad ipəyi XX əsrin əvvəlində beynəlxalq sərgi və yarmarkalarda 13 qızıl medala layiq görülüb.

Ekspert məqalənin sonunda yazır ki, bənzərsiz memarlığı və tarixi abidələri ilə seçilən Ordubad 1977-ci ildə şəhər-qoruq elan edilib.

Yusif Babanlı

AZƏRTAC-ın xüsusi müxbiri

Vaşinqton