SİYASƏT
Fransa ATƏT-in Minsk qrupunun həmsədri kimi öz üzərinə düşən missiyanı yerinə yetirə bilmədi
Bakı, 27 noyabr, AZƏRTAC
Bu günlərdə bir qrup fransalı senator Dağlıq Qarabağın müstəqil bir dövlət kimi tanınması təşəbbüsü ilə çıxış edib. Fransa Senatı səs çoxluğu ilə hökumətdən qondarma “Dağlıq Qarabağ respublikası”nı tanımağa çağıran qətnaməni qəbul edib. Bu senatorların kimliyi ilə maraqlandıqda məlum olur ki, onlar təkcə Fransada deyil, bütün Avropada qatı millətçiliyi və separatizmi təbliğ edən siyasətçilər kimi tanınır.
Bu sözləri AZƏRTAC-a açıqlamasında Milli Məclisin deputatı Kamilə Əliyeva söyləyib.
K.Əliyeva bildirib ki, Fransada çox sayda erməni yaşayır. Burada erməni lobbisi və təşkilatları çox güclüdür. Onlar həm də böyük maliyyə imkanlarına malikdirlər. Bütün dünyada olduğu kimi, Fransada da fəaliyyət göstərən erməni lobbisi azərbaycanlılara və türklərə qarşı həmişə düşmən mövqedə olub.
Deputatın sözlərinə görə, erməni lobbisi Fransa siyasi dairələrinə təsir edə biləcək gücə də malikdir. Buna görə də belə millətçi senatorlar Fransadakı ermənilərdən bəhrələnərək Azərbaycana qarşı bu cür mövqe sərgiləyirlər. Amma başa düşmürlər ki, Fransa dövləti istər Azərbaycan BMT-yə üzv daxil edilərkən, istərsə də BTM Təhlükəsizlik Şurasının daimi üzvü kimi Dağlıq Qarabağı ölkəmizin tərkib hissəsi kimi tanıyıb. Belə siyasətçilər Azərbaycana düşmən mövqeyi ilə yanaşı, öz dövlətinə, onun beynəlxalq aləmdəki nüfuzuna da zərbə vurmuş olurlar.
K.Əliyeva vurğulayıb ki, Azərbaycan Prezidenti, Müzəffər Ali Baş Komandan İlham Əliyevin apardığı uğurlu və müdrik xarici siyasət nəticəsində dünyanın bir sıra dövlətlərinin Azərbaycana qarşı qərəzçilik ab-havası əriməyə başlayıb. Belə ki, Avropanın bir sıra dövlətləri Azərbaycanın apardığı mübarizənin beynəlxalq hüquqa tam uyğun olduğunu vurğulayıb.
“Prezident Emmanuel Makronun ermənilərin təşkil etdiyi tədbirdə Azərbaycan haqqında dediyi fikirləri dinlədikdə Fransanın nəhayət ki, Azərbaycanın işğala məruz qaldığını dərk etdiyinə inanmaq istərdik. Fransa Senatının qəbul etdiyi bu qətnamə bir daha sübut etdi ki, Fransa dövləti Azərbaycana qarşı qərəzli, eyni zamanda, düşmən mövqeyi bəsləyir. Qəbul edilən qətnamənin ardınca Fransa XİN-in dövlət katibi Senatın bu qərarının hökumətin siyasətini əks etdirmədiyi haqqında fikir bildirdi. Əslində, qəbul edilmiş bu qətnamə həqiqətən də Azərbaycan üçün heç bir əhəmiyyət kəsb etmir”, - deyə deputat diqqətə çatdırıb.
Onun sözlərinə görə, Fransa ATƏT-in Minsk qrupunun həmsədri kimi öz üzərinə düşən missiyanı yerinə yetirə bilmədi, bitərəf mövqeyini qorumadı. Bu səbəbdən Fransanın bu münaqişənin həlli prosesində artıq heç bir rolu olmamalıdır. Təcavüzkar dövləti və cinayətkar qurumu müdafiə etmək onunla bir sırada olmaq anlamına gəlir.
“Fransanın hakim ictimai-siyasi dairələri başa düşməlidirlər ki, iqtisadi cəhətdən inkişaf etmiş güclü Azərbaycanla əməkdaşlıq onlar üçün daha önəmlidir, nəinki yoxsul və rəzalət içində olan Ermənistan dövlətinin sərsəm ideyalarını müdafiə etmək”, - deyə Kamilə Əliyeva bildirib.