İQTİSADİYYAT


Fransanın Overny-Ron-Alp regionu ilə ölkəmiz arasında kənd təsərrüfatı sahəsində əməkdaşlıq müzakirə edilib

Lion, 23 fevral, AZƏRTAC

Fransanın Overny-Ron-Alp regionunda işgüzar səfərdə olan Azərbaycanın kənd təsərrüfatı naziri İnam Kərimov bu regionun Ticarət Palatasının rəhbərləri ilə görüşüb.

AZƏRTAC xəbər verir ki, görüşdə regionda kənd təsərrüfatı sahəsində əməkdaşlığın perspektivləri, qarşılıqlı sərmayə yatırımı, eləcə də ticarət əlaqələrinin qurulması imkanları müzakirə edilib.

Nazir İnam Kərimov ölkəmizdə kənd təsərrüfatı sahəsində əməkdaşlıq imkanları, bu sahəyə dövlət dəstəyi haqqında ətraflı məlumat verib. Həmçinin Azərbaycanda yaradılmış ilk kooperativin uğurlu fəaliyyətindən danışaraq, yeni kooperativlərin yaradılması planlarından söz açıb.

Overny-Ron-Alp regionunun regional müşaviri, regional əməkdaşlıq şəbəkəsinin (RESACOOP) prezidenti Alen-Berlioz Kurle, regionun kənd təsərrüfatı palatasının prezidenti Jilber Giqnan, Ticarət Palatasının beynəlxalq əlaqələr üzrə direktoru Floran Beltet kənd təsərrüfatının müxtəlif sektorları üzrə əməkdaşlıq imkanları haqqında geniş məlumat verib, ölkəmizlə əməkdaşlıqda maraqlı olduqlarını vurğulayıblar.

Həmçinin Azərbaycanın kənd təsərrüfatı naziri Overny-Ron-Alp regionunun “Şərablar” komitəsinin regional nümayəndəsi və “Coop de France” kooperativlər federasiyasının regional direktoru ilə görüşüb. Görüşdə ölkəmizdə üzümçülük və şərabçılığın inkişafına dair Dövlət Proqramı haqqında ətraflı məlumat verilib.

Tərəflər bu sahədə, eləcə də kooperativlərlə bağlı təcrübələrin qarşılıqlı bölüşməsini müzakirə ediblər.

Şəhla Ağalarova

AZƏRTAC-ın xüsusi müxbiri

Lion

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.