REGİONLAR
Füzuli rayonu üzrə birinci siniflərə 1150 nəfər şagird qədəm qoyub
Füzuli, 15 sentyabr, Tahir Ağaməmmədov, AZƏRTAC
Sentyabrın 15-də Füzuli rayonu üzrə 1150 şagird birinci sinfə qədəm qoyub. Ümumilikdə isə 2020-2021-ci dərs ilində rayonun təhsil müəssisələrində 14 min nəfərə yaxın şagird təhsil alacaq.
Füzuli Rayon Təhsil Şöbəsindən AZƏRTAC-ın bölgə müxbirinə bildiriblər ki, ərazisinin bir hissəsi Ermənistan silahlı bölmələrinin işğalı altında olan Füzuli rayonunda 73 tam orta, 5 ümumi orta, 1 ibtidai məktəb, 1 musiqi təmayüllü internat tipli gimnaziya var. Məktəblərin 44-ü rayonun işğaldan azad edilmiş hissəsində, 15-i Bakı, 5-i Sumqayıt, 1-i Şirvan şəhərlərində, 2-si Sabirabad, 5–i İmişli, 7-si isə Beyləqan rayonları ərazisindədir.
Füzuli rayon 4 və 17 nömrəli tam orta məktəblərinin şagirdləri yeni dərs ilini yeni məktəblərdə qarşılayıblar. 4 nömrəli tam orta məktəb üçün Bakının Qaradağ rayonundakı “Qobu Park-3” yaşayış kompleksində yeni bina inşa edilib. 960 yerlik məktəb binası zəruri tədris avadanlığı ilə təchiz edilib, şagirdlərin yüksək səviyyədə təhsil alması üçün hərtərəfli imkan yaradılıb. 17 nömrəli köçkün tam orta məktəbi üçün Beyləqan rayonunun Şərq qəsəbəsində 96 şagird yerlik modul tipli məktəb binası quraşdırılıb. Bundan başqa, Bala Bəhmənli kənd tam orta məktəbi əsaslı təmir edilib.
Yeni dərs ilinə hazırlıqla bağlı Füzuli rayonunun bütün məktəblərində geniş təmizlik, tibbi-profilaktik işlər görülüb. Ümumi təhsil müəssisələrinə gigiyenik vasitələr, 7518 ədəd dərslik paylanılıb. Yaxın günlərdə təhsil ocaqlarına yenə də dərsliklərin gətirilməsi nəzərdə tutulur.
COVID-19 pandemiyası ilə əlaqədar tətbiq olunan xüsusi karantin rejiminin tələblərinə uyğun olaraq respublikamızın bütün bölgələrində olduğu kimi Füzuli rayonunda da “Bilik günü” qeyd edilməyib. Müəllim və şagirdlər bədən hərarətləri yoxlanıldıqdan sonra məktəblərə daxil olublar. İlk dərslər I- IV siniflərdə “Gigiyena qaydalarına necə əməl edirəm?” mövzusuna həsr olunub.
Qeyd edək ki, Nazirlər Kabinetinin müvafiq Qərarına əsasən, ümumi təhsil müəssisələrində dərs məşğələləri I-IV siniflərdə sentyabrın 15-dən əyani və distant (məsafədən) formada keçiriləcək. Həmçinin V-IX siniflərdə sentyabrın 15-dən distant, oktyabrın 1-dən əyani və distant (məsafədən), X-XI siniflərdə sentyabrın 15-dən distant, oktyabrın 15-dən əyani və distant (məsafədən) formalarda başlayacaq. Ümumi təhsil müəssisələrində dərs (təlim) və dərsdənkənar (praktiki) məşğələ saatları məktəbəhazırlıq mərhələsində 30 dəqiqə, ibtidai və ümumtəhsil səviyyələrində 45 dəqiqə olmaqla müəyyən edilib.