Bakı, 6 mart, AZƏRTAC

Bakı Şəhəri üzrə Təhsil İdarəsinin (BŞTİ) tabeliyindəki ümumtəhsil müəssisələri və uşaq-gənclər inkişaf mərkəzlərinin şagirdləri arasında gənc kimyaçıların yaradıcılıq müsabiqəsinin final mərhələsi keçirilib.

İdarədən AZƏRTAC-a bildirilib ki, Bakı Ali Neft Məktəbində (BANM) təşkil olunan tədbirdə əvvəlcə iştirakçılar universitetin auditoriyaları, elmi-tədqiqat laboratoriyalarındakı müasir texniki aparat və cihazlarla əyani şəkildə tanış olub, ali məktəbin fəaliyyəti və tədris olunan ixtisaslar barədə məlumat əldə ediblər.

Müsabiqədə 15 komanda ümumtəhsil məktəblərinin və uşaq-gənclər inkişaf mərkəzlərinin proqramlarına uyğun olaraq 2 akademik saat ərzində 30 sualdan ibarət test tapşırığını, 2 məsələni və 1 təcrübə işini yerinə yetirib.

Tədbirdə çıxış edən BANM-in rektoru Elmar Qasımov final mərhələsinə vəsiqə qazanan məktəbliləri təbrik edib, bu cür müsabiqələrin şagirdlərin bilik və bacarıqlarının artırılmasına, təlimdə motivasiyasının yüksəldilməsinə müsbət təsir göstərdiyini deyib.

BŞTİ-nin müdiri Rəşad Tağıyev müsabiqənin məktəblilərin kimya fənninə olan marağının daha da artırılması, onların bu sahədə nəzəri və təcrübi biliklərinin təkmilləşdirilməsi, istedadlı şagirdlərin aşkara çıxarılması məqsədilə IX, X və XI sinif şagirdləri arasında təşkil edildiyini söyləyib.

Qeyd edib ki, müsabiqənin final mərhələsində təcrübə işinin yerinə yetirilməsi məktəblilərin tədqiqat işlərinə marağının artırılması və ali təhsil müəssisələrinin təcrübə imkanlarından şagirdlərin istifadə etməsinə şərait yaradılmasında böyük əhəmiyyətə malikdir.

Nəsimi rayonu üzrə 42, Sabunçu rayonu üzrə 72, 271, Xəzər rayonu üzrə 117, Suraxanı rayonu üzrə 146, Yasamal rayonu üzrə 153, Binəqədi rayonu üzrə 244, Nizami rayonu üzrə 229, Qaradağ rayonu üzrə 228, Nərimanov rayonu üzrə 45, Səbail rayonu üzrə 236, Pirallahı rayonu üzrə 243, Xətai rayonu üzrə 55, 116 nömrəli tam orta məktəblərin və 287 nömrəli “Zəkalar” liseyinin komandaları müvəffəqiyyət qazanaraq III mərhələdə iştirak etmək hüququ qazanıblar.

Daha sonra finala vəsiqə qazanmış 45 şagirdə sertifikatlar təqdim olunub.

Qeyd edək ki, müsabiqənin final mərhələsində doğru cavablandırılan hər bir test tapşırığı 1, məsələ və təcrübə işi isə 5 balla qiymətləndiriləcək. Ekspert qrupları tərəfindən müsabiqənin nəticələri təhlil ediləcək, qalib komandalara BŞTİ tərəfindən diplom və hədiyyələr veriləcək.