İDMAN
Gənclər və idman naziri qitələrarası boccia çempionatında uğurla çıxış etmiş paralimpiyaçılarımız ilə görüşüb
Bakı, 19 aprel, AZƏRTAC
Gənclər və idman naziri Fərid Qayıbov Xorvatiyanın Zaqreb şəhərində qitələrarası boccia çempionatında uğurla çıxış etmiş Azərbaycan paralimpiyaçıları ilə görüşüb.
AZƏRTAC Gənclər və İdman Nazirliyinin mətbuat xidmətinə istinadla xəbər verir ki, görüş zamanı idmançılarımızı uğurlu çıxışları münasibətilə təbrik edən nazir federasiyanın fəaliyyəti, gələcək planları və idmançıların məşq şəraiti ilə maraqlanıb. Qeyd olunub ki, boccia 2014-cü ildən yaransa da, ölkəmizdə bu federasiya 2018-ci ildən, Heydər Əliyev Fondunun vitse-prezidenti Leyla Əliyevanın dəstəyi ilə fəaliyyətə başlayıb. Bu günədək idmançılarımız beynəlxalq yarışlarda 3 qızıl və 7 bürünc medal qazanıblar.
Görüşdə nazir müavini Mariana Vasileva, Boccia İdman Federasiyasının Baş katibi və baş məşqçisi İlham Məhərrəmov, məşqçilərdən Taleh Zeynalov, Elşən Məhərrəmov, Ruhin Cəfərov, Nicat Ağayev, Mədinə Abbasova, idmançılardan Bəhruz Mirzəyev, Sona Ağayeva (hər ikisi qızıl medal), Orxan Kərimov (bürünc medal) və Zaur Veysəlov (6-cı yer) iştirak ediblər.