MƏDƏNİYYƏT
Görkəmli kinorejissor Hüseyn Seyidzadənin yaradıcılıq otağının açılışı olub VİDEO
Bakı, 2 avqust, Məmməd Məmmədli, AZƏRTAC
“Azərbaycanfilm” Kinostudiyasının binası təkcə istehsal sahəsi deyil, eyni zamanda, böyük mədəniyyət mərkəzidir. Əminliklə demək olar ki, burada Azərbaycanın böyük mədəniyyət tarixi yerləşir.
AZƏRTAC xəbər verir ki, bu sözləri C.Cabbarlı adına “Azərbaycanfilm” Kinostudiyasının direktoru Müşfiq Hətəmov kino günü münasibətilə görkəmli rejissor Hüseyn Seyidzadənin kinostudiyada yerləşən iş otağının açılışında söyləyib.
M.Hətəmov deyib: “Bilirsiniz ki, bundan əvvəl görkəmli rejissorlarımız Rasim Ocaqov və Tofiq Tağızadənin çalışdığı otaqların açılış mərasimi olmuşdu. Kinostudiyada muzey-otaqlar kimi fəaliyyət göstərən bu məkanlar korifey sənətkarların yaradıcılığı, iş prosesi barədə təsəvvür yaratmaqla yanaşı, eyni zamanda, onların xatirəsinin əbədiləşdirilməsinə xidmət edir. Kinostudiyanın hər bir otağı, sənət və yaradıcılıq məkanı kino tariximizi özündə yaşadan xatirədir. Yaxın gələcəkdə unudulmaz kino xadimlərimiz Həsən Seyidbəyli, Əlisəttar Atakişiyev və aktirsa Leyla Bədirbəylinin yaradıcılıq otaqlarının açılışı nəzərdə tutulub. Onlar Azərbaycan kinosunda xüsusi xidmətləri olan insanlardır və biz bu ənənəni davam etdirəcəyik”.
Kinoşünas, Əməkdar incəsənət xadimi Aydın Kazımzadə görkəmli rejissorun yaradıcılıq yolundan, sənət üçün sərf etdiyi əməkdən danışıb: “Bu çox qəribə səslənsə də həqiqətdir. Hüseyn Seyidzadəyə digər ölkələrdə işləmək üçün dəvətlər gəlsə də o, xalqına xidmət göstərməyi üstün tutub “Qalada üsyan” romanı əsasında “Yenilməz batalyon” filminin ssenarisi üzərində böyük əziyyətlərlə, heç bir məvacib almadan, doqquz ay işlədikdən sonra onu çəkib. Bu, Hüseyn Seyidzadənin öz işinə necə həssas yanaşmasının göstəricisidir”.
Xalq artisti, rejissor Oqtay Mirqasımov söyləyib: “Hər bir rejissor qeyri-adi sayıla bilər, çünki bu peşə heç də standartı sevmir. Amma Hüseyn Seyidzadənin bu cür fərqli olması Azərbaycan kino tarixində nadir bir hadisədir. Mən onun filmlərini bir neçə dəfə, təkrar olaraq izləmişəm. Çünki Hüseyn Seyidzadə mənim üçün özəl bir məktəbdir. Kinonu öyrənən tələbələr arasında söhbət düşəndə mən onlara filmlərimizə baxmağı məsləhət görmüşəm. Hüseyn Seyidzadənin filmlərinin montajı, kadrda estetik təmizliyi, aktyor oyunu, bütün bunlar onun hansı səviyyədə bir rejissor olduğundan xəbər verirdi. Onun filmlərində böyük qüvvələrin - ədalət və ədalətsizlik, xoş və bədbin niyyət toqquşmasıyla yanaşı gerçək insan dramı görürük”.
Kinoşünas, Əməkdar incəsənət xadimi Ayaz Salayev kinostudiyanın Azərbaycan kino tarixindəki əhəmiyyətindən bəhs edib: “Kinostudiyanın “xatirə otaqları” ənənəsinin davam etməsi hamımızı sevindirir. Hamı bilməlidir ki, bu studiyanın divarları müqəddəsdir. Xalq tərəfindən sevilən ekran əsərləri məhz bu konostudiyanın otaqlarından pərvazlanaraq lentə köçürülüb. Dəfələrlə demişəm “Azərbaycanfilm” Kinostudiyası Milli Kitabxana, R.Mustafayev adına Dövlət İncəsənət Muzeyi, Dövlət Akademik Filarmoniyası, Bakı Musiqi Akademiyası kimi ölkəmizin mədəni ocaqlarından birinə çevrilməlidir. Çünki bu binadan yüzlərlə sevilən filmlər, rejissorlar, operatorlar, rəssamlar, aktyor və aktrisalar çalışaraq əmək sərf ediblər. Xatirə otaqlarının açılışının ənənəyə çevrilməsi, korifey ustadların çalışdığı otaqların bərpa olunması gələcək üçün tarixdir. Bu gün kinostudiyanın dəhlizlərində böyük sənətkarların ruhu dolaşır. Bu otaqda da həmişə xoş xatirələr anılacaq. Gənc rejissorlar hər zaman böyük ustadların sənətini və kinomuzun tarixini unutmadan ənənələrə ləyaqətlə xidmət edəcəklər”.