Göyçay, 18 avqust, Şahnəzər Bəşirov, AZƏRTAC

Son aylar bir sıra kənd təsərrüfatı məhsullarının istehsalı və ixracı üzrə yaradılan assosiasiyalar ölkədə aqrar sektorun inkişafına müsbət təsirini göstərir. Azərbaycan Xurma İstehsalçıları və İxracatçıları Assosiasiyasının yaradılması xüsusi əhəmiyyətə malikdir. Məlum olduğu kimi, Azərbaycanın bir çox rayonlarında, xüsusən də Göyçayda yüksək keyfiyyətli xurma yetişdirilir və Rusiya bazarlarında ona böyük tələbat var.

AZƏRTAC xəbər verir ki, bu fikirlər Göyçay Gənclər Mərkəzində keçirilən Azərbaycan Xurma İstehsalçıları və İxracatçıları Assosiasiyasının təsis konfransında səsləndirilib. Yığıncaqda Azərbaycanda İxracın və İnvestisiyaların Təşviqi Fondunun vitse-prezidenti Yusif Abdullayev, Azərbaycan-Rusiya İşgüzar Şurasının icraçı direktoru Çingiz Məmmədyarov, xurma istehsalı və ixracı ilə məşğul olan Göyçay və ətraf rayonların fermerləri, iş adamları iştirak ediblər.

Yığıncaqda çıxış edən Azərbaycanda İxracın və İnvestisiyaların Təşviqi Fondunun vitse-prezidenti Yusif Abdullayev bildirib ki, Azərbaycan Respublikasının Prezidenti İlham Əliyevin rəhbərliyi ilə ölkəmizdə aparılan islahatlar, iqtisadiyyatın şaxələndirilməsi, sahibkarlığın inkişafı və həyata keçirilən çevik iqtisadi islahatlar sayəsində ölkə iqtisadiyyatı öz dayanıqlığını möhkəmləndirir və bütün bu nailiyyətlər ölkə başçısının apardığı uğurlu siyasətin nəticəsidir. O, Göyçayın bütün kəndlərində ixracyönümlü məhsul olan xurma yetişdirildiyini, kənlilərin bu sahəyə böyük marağının olduğunu, rayon bağbanları üçün xurmanın nardan sonra ikinci gəlirli sahə hesab edildiyini və məhsulun böyük bir hissəsinin Rusiyaya ixrac edildiyini bildirib.

Yusif Abdullayev qeyd edib ki, bu baxımdan Azərbaycan Xurma İstehsalçıları və İxracatçıları Assosiasiyasının təsis konfransının da Göyçayda keçirilməsi heç də təsadüfü deyil. Çünki burada yetişdirilən xurma məhsulu öz yüksək keyfiyyəti ilə seçilir və uzaq məsafələrə daşınması üçün də sərfəlidir. “Biz istərdik ki, xurma ilə bağlı ixrac imkanlarımız genişlənsin, nəinki MDB ölkələrinə, həm də Avropaya məhsul ixracını artıraq. Bütün bunları nəzərə alaraq İqtisadiyyat Nazirliyi və Azərbaycanda İxracın və İnvestisiyaların Təşviqi Fondu (AZPROMO) Azərbaycan Xurma İstehsalçıları və İxracatçıları Assosiasiyasının yaradılmasını məqsədə müvafiq bilir”.

Tədbirdə məlumat verilib ki, ötən il Göyçay rayonunda mövcud olan 805 hektar bar verən xurma bağından 18 min 700 ton məhsul əldə edilib. Kəndlilər məhsulu öz həyətlərində müştərilərə bir kiloqramını 0,5 manata satıblar. Yığılan məhsulun təxminən 70 faizi iş adamları tərəfindən Rusiya bazarlarına göndərilib. Məhsul ötən ildəkindən 400 ton çox olub. Belə ki, 2015-ci ildə rayonda xurma bağlarından 18 min 300 ton məhsul toplanmışdı. İş adamları rayon sakinlərindən aldıqları xurmanın bir hissəsini qış aylarına saxlayaraq baha qiymətə satmaq üçün Göyçayın Potu kəndindəki tutumu 700 ton və Ərəbcəbirli kəndindəki tutumu 1000 ton olan soyuducu anbarlara yerləşdirirlər.

Qeyd edək ki, göyçaylı fermerlər son illər rayonda xurma bağlarını xeyli genişləndiriblər. Ötən il rayonda 15 hektar sahədə yeni xurma bağları salınıb. Bu il rayonda daha 20 hektar yeni bağın salınması üçün işlər görülür. Mütəxəssislər rayonda bu sahənin sürətlə inkişafının səbəbini məhsulun yerli və xarici bazarlara çıxarılması üçün lazımi şəraitin yaradılması və meyvənin saxlanılması üçün Göyçayda soyuducu anbar komplekslərinin fəaliyyət göstərməsi ilə əlaqələndirirlər.

Yığıncaqda iştirak edən fermerlər, iş adamları aqrar sahənin inkişafını daim diqqət mərkəzində saxladığına, meyvə istehsalçılarına göstərilən diqqət və qayğıya görə ölkə Prezidentinə təşəkkür edib və qarşıya qoyulmuş vəzifələrin icrası üçün bütün səyləri sərf edəcəklərini bildiriblər.

Sonda göyçaylı iş adamı Qadir Yusifov yekdilliklə Azərbaycan Xurma İstehsalçıları və İxracatçıları Assosiasiyasının sədri seçilib.