DÜNYA


Gürcüstanda 4 nazir koronavirusa yoluxub

Tbilisi, 24 yanvar, AZƏRTAC

Gürcüstanda koronavirusa yoluxma halları artmaqda davam edir. Ölkənin 4 naziri də bu virusa yoluxub.

AZƏRTAC xəbər verir ki, bu barədə ölkə mətbuatı məlumat yayıb.

Bildirilir ki, Gürcüstanın müdafiə naziri Cuanşer Burçuladze, təhsil naziri Mixeil Çxenkeli, ətraf mühitin mühafizəsi və kənd təsərrüfatı naziri Levan Davitaşvili və regional inkişaf və infrastruktur naziri İrakli Karseladze koronavirusa yoluxublar. Bu səbəbdən də nazirlər hökumətin bugünkü iclasında iştirak etməyiblər.

Hazırda həmin nazirliklərin əməkdaşlarının da nəzarət altında olduğu bildirilir.

Qeyd edək ki, son sutkada Gürcüstanda daha 7 947 nəfər koronavirusa yoluxub, 31 pasiyent pandemiyanın qurbanı olub.

Bununla da ölkədə indiyədək COVID-19 infeksiyasına yoluxanların ümumi sayı 1 059 392-yə, ölənlərin sayı isə 14 732-yə çatıb.

Hazırda bəzi bölgələrdə, o cümlədən azərbaycanlıların yığcam yaşadıqları Marneuli rayonunda bir neçə məktəb məsafədən təhsilə keçib.

Marneuli rayonu 6 saylı ictimai məktəbdə müəllimlərin bir çoxu koronavirusa yoluxub və bu səbəbdən təhsil ocağı yanvarın 25-dən 8 günlük onlayn rejimdə fəaliyyət göstərəcək.

Bundan başqa, Marneulidə 3 ictimai məktəbin bəzi sinifləri də təhsil rejimini onlayn rejimdə davam etdirəcək.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.