SİYASƏT
Heç bir çətinlik aksiya iştirakçılarının əzmini sarsıda bilməz - 16-cı gün
Şuşa, 27 dekabr, Elmir Səftərov, AZƏRTAC
Laçın-Xankəndi yolundakı aksiya artıq 16 gündür fasiləsiz olaraq davam edir. Burada iştirak edən hər kəsin bir məqsədi var: torpaqlarımızda olan təbii sərvətlərin talanmasının dayandırılması və həmin ərazilərdə müvafiq dövlət qurumlarının monitorinq keçirməsi. Amma hələ ki, aksiya iştirakçılarının tələbləri yerinə yetirilməyib. Demək ki, Azərbaycan ərazilərində müvəqqəti yerləşdirilmiş sülhməramlılara monitorinqin aparılması qətiyyən sərf etmir. Çünki qanunsuz istismara məruz qalan ərazilər müvəqqəti olaraq onların mandatına daxildir. Azərbaycan fəalları isə ermənilərin və onlara dəstək verən ölkələrin planlarını müəyyən qədər pozub desək, yanılmarıq. Belə ki, Laçın dəhlizi vasitəsilə aksiyanın keçirildiyi ərazidən Xankəndidəki terrorçulara silah-sursat da daşınırdı. Amma hazırda erməni qanunsuz birləşmələrinə çatdırılan maddi-texniki təminatlar bilavasitə azalıb. Bu da aksiyanın mənfi davranışlarına qarşı yönəldiyini bir daha sübut edir.
AZƏRTAC-ın müxbiri Laçın-Xankəndi yolunda aksiya iştirakçılarının bəziləri ilə həmsöhbət olub.
|
"Aqrar İnkişaf Könüllüsü" Nicat Bayramov bu aksiyaya qoşulduğu üçün qürur duyduğunu bildirib: "Havanın soyuq olmasına baxmayaraq, aksiya iştirakçıları həvəslə öz tələblərini səsləndirirlər. Digər könüllü gənclər kimi biz də öz tələblərimizdə qərarlıyıq. İstəyirik ki, ərazilərimizdə olan faydalı qazıntı yataqlarının istismarı dayandırılsın. |
Azərbaycanlı fəalların aksiyanı dinc şəkildə həyata keçirdiklərini vurğulayan Nicat Bayramov deyib ki, bu haqlı etirazlar tamamilə beynəlxalq hüququn normaları çərçivəsindədir, məqsəd isə sülhə xidmət edir.
Aksiyada iştirak edən hər kəsin məqsədinin bir olduğunu vurğulayan könüllü Eyyub Yaqubov deyib: "Səsləndirdiyimiz şüarlar ermənilərin qanunsuz əməllərinə yönəlib. Hər kəs bilməlidir ki, bu aksiyanın əsas məramı nədir. Biz dinc şəkildə öz ərazilərimizdə haqlı etirazımızı səsləndiririk". Könüllü qeyd edib ki, aksiya nə qədər davam edəcəksə, biz də öz üzərimizə düşən vəzifələri layiqincə yerinə yetirməyə çalışacağıq. Əhvali-ruhiyyəmiz əladır, ekoloji terrorla bağlı şüarlarımızı səsləndirməyə davam edəcəyik. |
Aksiya könüllüsü Aydan Abbasovanın sözlərinə görə, çətinliklər aksiyada iştiraklarına mane olmayıb, əksinə onları daha da gücləndirib. “Burada olan hər kəs bunu 16 gündür ki, əyani şəkildə sübut edir. Aksiyanın müddəti uzandıqca buraya gəlmək istəyənlərin sayı da artır. Mən aksiyanın uğurla yekunlaşacağına, nəticə əldə ediləcəyinə tam inanıram. Ərazidə olan hər kəs inamla, ruh yüksəkliyi ilə təbii sərvətlərimizin qanunsuz istismarına qarşı öz etirazlarını bildirirlər", - deyə Aydan Abbasova vurğulayıb.O qeyd edib ki, tələbləri yerinə yetirilənədək aksiya davam edəcək. |
Ekologiyanı qorumağın əsas məqsəd olduğunu diqqətə çatdıran aksiya iştirakçısı Aysel Quliyeva isə söyləyib: "Hər bir Azərbaycan vətəndaşı bərabər, həmrəy olmalıdır. Çünki uğurlara gedən yol birlikdə olmaqdan keçir". O bildirib ki, heç bir çətinlik aksiya iştirakçılarının əzmini sarsıda bilməz. Bu səbəbdəndir ki, aksiya iştirakçıları 16 gündür böyük şücaət göstərirlər. |