CƏMİYYƏT
Hərə bir əsgər, hər ev bir səngər
Bakı, 23 oktyabr, AZƏRTAC
“Cəbhəyanı bölgələrdə müvafiq tədbirlərin təşkilinə dair təşəbbüslər və “Ordum.az” saytının yaradılması” layihəsi çərçivəsində Tərtər rayonunun Qapanlı kəndində “Hərə bir əsgər, hər ev bir səngər” mövzusunda tədbir keçirilib.
AZƏRTAC xəbər verir ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə keçirilən tədbirin məqsədi düşmənlə təmas xəttində sərhəd kəndlərimizdə yaşayan vətəndaşlarımıza mənəvi dəstək olmaq, onları vətənin keşiyini çəkən əsgərlərimizə arxa durmağa, tarixi torpaqlarımız olan ata-baba yurdlarına daha möhkəm bağlanmağa sövq etmək, yerli əhalini, xüsusən də yeniyetmə və gəncləri düşmənin millətimizə, dövlətimizə qarşı törətdiyi cinayətlər barədə maarifləndirmək, gəncləri ölkəmizin mənafeyini, xalqımızın milli-mənəvi dəyərlərini, öz yurdunu qorumağa, işğalçılara qarşı mübarizəyə səfərbər etməkdir.
“Hərbi Mövzular üzrə İxtisaslaşmış Jurnalistlər” İctimai Birliyinin təşkilatçılığı ilə keçirilən görüşdə iştirak edən ziyalılar əvvəlcə Qapanlı kəndində Şəhidlər xiyabanını ziyarət edib, Vətən uğrunda canlarından keçən qəhrəman igidlərimizin məzarları üzərinə tər çiçəklər qoyaraq onların xatirələrini yad ediblər. Qarabağ müharibəsi başlayandan ərazi bütövlüyümüz uğrunda şəhid olan onminlərlə oğullarımızdan Vidadi Məmmədov, Qüdrət Ağamalıyev, Zülfüqar Qasımov, Feyruz Əzimov, Sərvər Məmmədov və Nəriman Quliyev Qapanlıda torpağa tapşırılıblar.
Şəhid F.Həmidov adına Qapanlı kənd tam orta məktəbində kənd sakinləri ilə görüşdə respublikamızın müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Azərbaycan Mədəniyyət və İncəsənət Universitetinin dosenti, Əməkdar Artist Azad Şükür tədbirdə çıxış edərək belə görüşlərin əhəmiyyətini vurğulayıb.
Məktəbin direktoru Fitat Əliyeva bu təhsil ocağının 19 məzununun şəhid olduğunu bildirərək deyib: “Bu ərazidə atəşkəs hər gün pozulur. Bu məktəbin şagirdləri yaşından çox yaşamış şagirdlərdir, onlar hər gün atəşkəsin pozulmasının şahidi olurlar. Amma biz öz dövlətimizə güvənirik. Bu gün diqqət və qayğı nəticəsində özümüzü güclü hiss edirik. Biz bu məktəbdə əvvəlkindən də yaxşı dərs keçirik”.
Layihə rəhbəri, “Hərbi Mövzular üzrə İxtisaslaşmış Jurnalistlər” İctimai Birliyinin idarə heyətinin sədri Tamxil Ziyəddinoğlu “Hərə bir əsgər, hər ev bir səngər” mövzusunda məruzə ilə çıxış edib. O, “Azərbaycan Respublikası Silahlı Qüvvələrinin Ermənistan Respublikası silahlı qüvvələri ilə təmas xəttində bəzi təhlükəsizlik tədbirləri haqqında” dövlətimizin başçısının 2014–cü il 24 sentyabr tarixli Sərəncamını xatırladaraq, döyüş bölgəsində yaşayan əhalinin ayıq-sayıqlığının artırılması zərurətindən söz açıb. Qürur hissi ilə qeyd edib ki, indi torpaqlarımızı 1990-cı illərdəki kimi əliyalın könüllülər deyil, nizami Ordumuz qoruyur. Azərbaycan oğulları Silahlı Qüvvələrimizin bütün qoşun növlərində şərəflə xidmət keçirlər. İstər sərhədlərimizin keşiyində, istərsə də təhlükəsizliyimizin, asayişimizin qorunmasında vətənə ləyaqətlə xidmət edirlər. Hərbçilərimiz NATO sülhməramlılarının tərkibində İraqda, Kosovoda nümunəvi xidmətləri ilə Azərbaycanımıza həmişə başucalığı gətiriblər. Silahlı Qüvvələrimiz hazırda Cənubi Qafqazın ən güclü ordusuna çevrilib. İnanırıq ki, işğal altındakı ərazilərimiz tezliklə azad olunacaq və xalqımız əmin-amanlıq şəraitində indiki inkişaf dinamikasını daha yüksək səviyyədə davam etdirəcək. Bütün bunlar isə xalq-ordu birliyində öz təcəssümünü tapacaq. Biz daim ordumuza dəstək olmalı, Ordumuzun şəxsi heyəti ilə təmaslarımız sıx olmalıdır.
“Laçın yurdu” jurnalının baş redaktoru, şair Arif Məmmədli, Hacı Mahir Vəliyev, torpaq itkisinin acısını yaşayan tarixçi-publisist Siyavuş Əmirli, qapanlılılar adından çıxış edən kənd icra nümayəndəsi Lətif Həmidov ölkəmizin digər bölgələri kimi Tərtər rayonunun da igid oğul və qızlarının Vətənin müdafiəsinə qalxdıqlarını, torpaq, xalq uğrunda canlarını fəda etməkdən çəkinmədiklərini bildiriblər. Xüsusi vurğulanıb ki, düşmənlə üz-üzə olan Qapanlı kəndinin bir sakini də bu 25 ildə doğma yurdunu tərk etməyib.
“Sürgün”, “Mübariz” romanlarının və digər 16 kitabın müəllifi, yazıçı-publisist Miraslan Bəkirli bildirib ki, müharibə şəraitində ən çox çətinlik düşmənlə üzbəüz bölgədə məskunlaşan əhalinin üzərinə düşür. Məhz buna görə də sizin dövlət qayğısına daha çox ehtiyacınız var və bu gün bu qayğını hiss edirsiniz. Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yardımı ilə Bakıdan ziyalılar, bir qrup yazıçılar, şairlər sizin görüşünüzə gəlirsə, bu da dövlətimizin başçısının sizə qayğısının daha bir təzahürüdür. Qapanlı əhalisi ilə görüşdən məmnunluğunu, sakinlərin məğrurluğundan qürurlandığını bildirən yazıçı kitablarını imzalayaraq, kənd kitabxanasına və məktəbə, həmçinin sakinlərə hədiyyə edib.
Məktəbin hərbi müəllimi, Qarabağ qazisi, mayor Çingiz İsayev, gənc coğrafiya müəllimi Aysel Hacızadə və digərləri Prezident, Ali Baş Komandanı İlham Əliyevin rəhbərliyi ilə gündən-günə qüdrətlənən Ordumuza güvəndiklərini, Silahlı Qüvvələrimizin gücünə arxalanaraq rahat həyat sürməkdə davam etdiklərini və ata-baba yurdlarının bundan sonra daha da abadlaşmasına çalışacaqlarını söyləyiblər.
İllərdir erməni faşistlərinin atəşi altında mərdliklə dayanan Tərtər rayonunun Qapanlı kəndinin sakinləri ilə səmimi görüşdən sonra xatirə şəkli çəkdirilib.