İQTİSADİYYAT
Hibrid enerji sərfəli avtomobillər SOCAR-a təhvil verilib VIDEO
Bakı, 19 aprel, Elvin Camalov, AZƏRTAC
Dörd hibrid enerji sərfəli avtomobil Xəzər rayonunun Qala qəsəbəsindəki Eko-parkda BMT İnkişaf Proqramı (BMTİP) tərəfindən təqdim edilərək SOCAR-a təhvil verilib.
AZƏRTAC xəbər verir ki, bu avtomobillər benzin enerjisini elektrik enerjisinə çevirmək və öz növbəsində mühərriki işə salmaq üçün nəzərdə tutulub. Avtomobillər SOCAR-ın ekoloji məsələlər üzrə vitse-prezidenti Rəfiqə Hüseynzadəyə təhvil verilib.
BMTİP Rezident nümayəndəsinin müavini Alessandro Frakassetti Azərbaycanda enerji səmərəli tədbirləri həyata keçirən layihələrin əhəmiyyətini vurğulayıb. SOCAR-ın sərfəli enerji tədbirləri təcrübəsinin digər dövlət qurumları və özəl sektor tərəfindən də mənimsənilməsinə ümid etdiyini bildirib.
SOCAR-ın vitse-prezidenti Rəfiqə Hüseynzadə layihəni SOCAR-ın iddialı "sıfır emissiyalı şirkət”ə çevrilməsi planının bir hissəsi olduğunu bildirib. Bu strategiyanın Azərbaycanın iqtisadiyyatı və inkişafına, eləcə də daha təmiz ətraf mühitin təmin edilməsinə xidmət göstərəcəyini söyləyib. O bildirib ki, avtomobillər Qlobal Ekoloji Fond tərəfindən maliyyələşən, UNDP və SOCAR tərəfindən birgə həyata keçirilən layihə çərçivəsində alınıb və gələn ilin əvvəlində əlavə bir neçə maşının alınması nəzərdə tutulur. Onun sözlərinə görə, iki il öncə SOCAR və BMT arasında imzalanan “Azərbaycanın yanacaq istehlakı sektorunda karbon emissiyalarının azaldılmasını təmin edən Milli Fəaliyyət Planları” (NAMA) adlı layihə elektriklə çalışan avtomobillərlə yanaşı, binalara ekoloji üzlüklərin vurulması, Siyəzəndə aşağıtəzyiqli qazların yığılaraq əhaliyə verilməsini və digər məsələləri əhatə edir. Rəfiqə Hüseynzadə bildirib ki, qrant layihəsinin dəyəri 3,7 milyon dollardır.
Mərasimdən sonra iştirakçılar Əlaqələndirmə Komitəsi Görüşündə layihənin 2016-cı ildə əldə etdiyi nəzərdən keçirib və 2017-ci il üçün layihə planlarını müzakirə ediblər. Tədbir SOCAR tərəfindən təşkil edilən ağacəkmə aksiyası ilə tamamlanıb.
Qeyd edək ki, avtomobillər Qlobal Ekoloji Fond tərəfindən maliyyələşən, BMTİP və SOCAR tərəfindən birgə həyata keçirilən layihə çərçivəsində alınıb. Bir müddət əvvəl seçilmiş 12 SOCAR sürücüsünə eko-sürücülük üzrə təlimlər keçirilib. Test nəticələrindən məlum olub ki, təlimlər əsasında sürücülər tərəfindən yanacağın istehlakı 8 faizdən 20 faizədək azalıb.
Bu layihə çərçivəsində yanacaq istehlakı sektorunda karbon emissiyalarının azaldılması üzrə silsilə tədbirlərdən yalnız biridir. Digər fəaliyyətlərə mövcud sahilyanı neft və qaz yataqları ərazisində baca və havaya buraxılan qazların yığılması, enerji səmərəli binaların və kiçik külək turbinlərinin qurulması daxildir.
"Azərbaycanın yanacaq istehlakı sektorunda karbon emissiyalarının azaldılmasını təmin edən Milli Fəaliyyət Planları" adlı layihənin məqsədi tikinti, nəqliyyat və qaz emalı kimi üç sahədə səmərəli enerji pilot tədbirləri həyata keçirməkdir. Layihə BMT Dayanıqlı İnkişaf Gündəliyi, Azərbaycanın Milli İnkişaf Strategiyası və SOCAR-ın "sıfır emissiya" strategiyasını dəstəkləyir.