Bakı, 15 aprel, AZƏRTAC

Bu il “İMAGİNE” Avropa Tolerantlıq Festivalı ilk dəfə Gəncə şəhərində təşkil olunacaq. Bu festival bizi bir araya gətirən məsələləri müzakirə etməyə və anlamağa imkan verir.

AZƏRTAC xəbər verir ki, bu fikirləri jurnalistlərə Avropa İttifaqının ölkəmizdəki nümayəndəliyinin rəhbəri Kestutis Yankauskas Azərbaycanda 3-cü “İMAGİNE” festivalının açılışına həsr olunmuş mətbuat konfransında deyib.

Kestutis Yankauskas bildirib ki, bu il festival xüsusi şəkildə keçiriləcək. Festival ilk dəfə Gəncə şəhərində təşkil olunacaq. Festival günlərində müxtəlif tədbirlər - konsertlər, sərgilər, kino nümayişləri təşkil ediləcək.

Qeyd edilib ki, sayca üçüncü “İMAGİNE” tolerantlıq və mədəni müxtəliflik festivalı mayın 1-dən 15-dək keçiriləcək.

Festivalın zəngin proqramı sənədli kino ilə yanaşı, musiqi axşamlarını, ustad dərslərini, teatr tamaşalarını, həmçinin dünya şöhrətli rejissor və musiqiçilərlə diskussiyaları əhatə edəcək.

Bildirilib ki, festival Şərq Tərəfdaşlığının 10 illik yubileyi münasibətilə Avropa İttifaqının Azərbaycandakı nümayəndəliyi, Avropa İttifaqına üzv ölkələrin və Argentina, Meksika, Kolumbiya, Moldova, İsrail səfirliklərinin “United Cultures” ilə əməkdaşlığı çərçivəsində reallaşacaq.

Mədəniyyət Nazirliyinin sektor müdiri Ramil Abbakirov bildirib ki, mayın ilk günlərində Bakıda Ümumdünya Mədəniyyətlərarası Dialoq Forumu keçiriləcək və bura gələn bir çox qonaqların “İMAGİNE” festivalında iştirakı da gözlənilir.

Festivalın tərəfdaşlarından biri olmaqdan qürur duyduqlarını bildirən Birləşmiş Mədəniyyətlər Təşkilatının icraçı direktoru Paola Casagrande çıxışında qeyd edib ki, bizim 9 qonağımız olacaq. Onlar Gəncədə, Nizami kinoteatrında, “Salaam Cinema”da, Azərbaycan Dillər Universitetində və bir sıra yerlərdə tədbirlər keçirəcək.

Bildirilib ki, festivalın ilk günü, mayın 1-də fotoqraf Nikola Landemardın İbrahim Əbilov adına Mədəniyyət Mərkəzində fotosərgisi açılacaq. Onun sərgisi müxtəlifliyə həsr olunub və üç mövzunu əhatə edir: Avropa siyasətçiləri, Fransa teatrında qaçqınların çıxışı və Brüsseldə yerləşən Avropa məhəllələri.

Festivalın digər qonaqlarından biri də saksofonçu Marselo Monkadadır. O, “İçərişəhər” metro stansiyasında insanların əhatəsində çıxış edəcək. Andalusiyadan olan gitaraçı El Amir, portuqaliyalı qadın müğənni Maqda Mendes, kinorejissor Robert Rombout da festivalın qonaqları sırasındadır. R.Rombout festival çərçivəsində ABŞ şəhərlərindən bəhs edən filmini də nümayiş etdirəcək. Paavo Vesterberq adlı Finlandiyadan olan kinorejissor Mədəniyyət və İncəsənət Universitetində ustad dərsləri keçəcək.

Bakı Avropa Liseyinin direktoru Zülfiyyə Veysova deyib: “Biz artıq beş ildir ki, multikulturalizm, tolerantlıq istiqamətində fəaliyyət göstəririk. Bizim də bu festivalda Avropa ölkələrinə həsr olunmuş tolerantlıq ideyasını təmsil edəcək təqdimatımız olacaq”.

Sonda jurnalistləri maraqlandıran suallar cavablandırılıb.