CƏMİYYƏT


İcbari Tibbi Sığorta üzrə Dövlət Agentliyi Mərkəzi Klinika ilə əməkdaşlıq edəcək

Bakı, 14 sentyabr, AZƏRTAC 

Sentyabrın 14-də İcbari Tibbi Sığorta üzrə Dövlət Agentliyi (İTSDA) və Mərkəzi Kliniki Xəstəxana arasında əlaqələrin qurulması və genişləndirilməsinə dair əməkdaşlıq haqqında memorandum imzalanıb. Sənədi agentliyin İdarə Heyətinin sədri Zaur Əliyev və Mərkəzi Klinikanın baş direktoru İxtiyar Sultanov imzalayıblar.

Bu barədə AZƏRTAC-a agentliyin ictimaiyyətlə əlaqələr sektorundan bildirilib.

Tədbirdə çıxış edən agentliyin İdarə Heyətinin sədri bildirib ki, əməkdaşlıq tibb müəssisələrinin səmərəli fəaliyyətinin təşkilinə, ayrı-ayrı ixtisaslar üzrə tibbi xidmətlərin müasir tələblərə uyğun qurulmasına, göstərilən tibbi xidmətlərin keyfiyyətinin artırılmasına, tibb personalının bilik, bacarıq və praktik təcrübəsinin təkmilləşdirilməsinə, innovativ müalicə üsulları və tibbi texnologiyaların tətbiqinə dair maarifləndirməyə və dolayısı ilə əhalinin məmnunluq səviyyəsinin yüksəldilməsinə, eləcə də müxtəlif sahələrdə yerli və beynəlxalq mütəxəssislərin iştirakı ilə seminar, konfrans və təlimlərin təşkili işlərinin aparılmasına öz töhfəsini verəcək.

Mərkəzi Klinikanın baş direktoru öz növbəsində agentlik ilə əməkdaşlığın səmərəli nəticə verəcəyinə əminliyini ifadə edib.

Tərəflər arasında imzalanan memoranduma tibb sahəsində müasir müalicə və müayinə üsulları barədə seminarların və tibbi xidmətlərin təşkili üzrə təlimlərin keçirilməsi, Mərkəzi Klinikanın və pilot layihə müddətində agentliyin tabeliyinə verilmiş tibb müəssisələrinin mütəxəssislərinin birgə iştirakı ilə yüksək texnologiya tələb edən tibbi müdaxilələrin həyata keçirilməsi kimi məsələlər daxil edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.