SİYASƏT


İndoneziyanın KİV-ləri Azərbaycan torpaqlarının işğaldan azad olunması barədə məlumatlandırılıb

Cakarta, 18 noyabr, AZƏRTAC

Azərbaycanın Ermənistan ordusu tərəfindən uzun illərdən bəri işğal altında saxlanılan torpaqlarının azad edilməsi barədə İndoneziya mətbuatında təbliğat işinin davam etdirilməsi məqsədilə, ölkəmizin İndoneziyadakı səfiri Cəlal Mirzəyev Qərbi Yava əyalətinin Purvakarta şəhərinə səfəri çərçivəsində burada fəaliyyət göstərən kütləvi informasiya vasitələrinə müsahibələr verib.

AZƏRTAC xəbər verir ki, “Radio Akom” və “Ash-Shidiq” radiolarına, “Pasudan Ekspres” qəzetinə və “Jabarnews.com” xəbər portalına müsahibələrində səfir Azərbaycanın coğrafi mövqeyi, tarixi və iqtisadiyyatı haqqında ətraflı danışıb. Diplomat Azərbaycan ilə İndoneziya arasında siyasi və iqtisadi münasibətlər, həmçinin iki dost ölkənin regionlarının əməkdaşlıq imkanları haqqında məlumat verib.

Eyni zamanda, C.Mirzəyev Ermənistanın Azərbaycana qarşı hərbi təcavüzü, beynəlxalq səviyyədə tanınmış ərazilərimizin bu ölkənin silahlı qüvvələri tərəfindən işğal edilməsi və həmin ərazilərdə azərbaycanlıların etnik təmizləməyə məruz qalması barədə sualları cavablandırıb. Səfir işğal nəticəsində 1 milyondan çox soydaşımızın qaçqın və məcburi köçkünə çevrildiyini, Ermənistanın BMT Təhlükəsizlik Şurasının qəbul etdiyi qətnamələrin icrasına məhəl qoymadığını bildirib.

Cari ilin iyulundan başlayaraq Ermənistan silahlı qüvvələrinin sərhəddə və təmas xətti boyunca intensiv şəkildə hərbi təxribatlara əl atması, xüsusilə sentyabrın 27-də genişmiqyaslı hərbi təcavüzə başladığı vurğulanıb.

Səfir C.Mirzəyev Ermənistan silahlı qüvvələrinin Birinci Qarabağ müharibəsi zamanı qadın, uşaq, yaşlı insanlar arasında fərq qoymayaraq, qətliamlar törətməsi, tarixi-dini abidələri dağıtması, hətta Azərbaycan xalqının hisslərini təhqir etmək məqsədilə işğal altındakı torpaqlarımızdakı məscidləri tövləyə çevirərək orada donuz saxlamaları haqqında geniş danışıb.

Həmçinin Ermənistan silahlı qüvvələrinin sentyabrın 27-dən etibarən Azərbaycana qarşı başladığı yeni hərbi təcavüz zamanı xüsusilə Gəncə, Bərdə, Tərtər və digər şəhərlərə endirilən raket zərbələri ilə mülki əhaliyə qarşı törədilən amansız hücumlar barədə geniş məlumat verilib. Bildirilib ki, bu hücumlar nəticəsində onlarca insan, o cümlədən uşaqlar və qadınlar həlak olub, yüzlərlə sakin yaralanıb. İndoneziyalı jurnalistlər Ermənistan silahlı qüvvələrinin Azərbaycan xalqının başına gətirdiyi faciələrə, son günlərdə yaşanan hadisələrə görə dərin təəssüf hissi keçirdiklərini və ən qısa zamanda ədalətin öz yerini tapacağına ümid etdiklərini bildiriblər.

Haqlı mübarizəmizin təkcə İndoneziya XİN tərəfindən deyil, həmçinin İndoneziya Nümayəndələr Palatasının Parlamentlərarası Əməkdaşlıq Komitəsi, Parlament fraksiyaları, İndoneziyanın bütün müsəlman dini icmalarını özündə birləşdirən Üləmalar Məclisi tərəfindən yazılı bəyanatlarla dəstəkləndiyi müsahibələrdə xüsusi vurğulanıb.

Azərbaycanlı səfir indoneziyalı dinləyicilərə və oxuculara ölkəmizin iqtisadi inkişafı, aparılan islahatlar, Azərbaycanın regionda liderliyi ilə həyata keçirilən irimiqyaslı transregional enerji və infrastruktur layihələri, habelə Azərbaycan–İndoneziya münasibətləri barədə də geniş məlumat verib. Ölkələrimiz arasında əməkdaşlığın inkişaf yolunda olduğu və bu əlaqələrin daha yüksək səviyyəyə qaldırılması məqsədilə bir sıra konkret sahələrdə əməkdaşlığın inkişaf etdirilməsinin zəruriliyi vurğulanıb.

Ölkələrimiz arasında investisiya qoyuluşu sahəsində əməkdaşlıq üçün böyük potensialın olduğunu qeyd edən diplomat Azərbaycandakı əlverişli investisiya mühiti haqqında məlumat verib. Azərbaycan–İndoneziya münasibətlərinin möhkəm zəmində inkişaf etdirilməsi məqsədilə ölkələrimizin regionları arasında əlaqələrin yaradılmasının zəruriliyini vurğulayıb.

Müsahibələr zamanı Ermənistan silahlı qüvvələrinin Azərbaycana qarşı son hərbi təcavüzü nəticəsində dinc əhaliyə, dini abidələrə qarşı hücumları əks etdirən əyani materiallar mətbuat nümayəndələrinə təqdim edilib.

 

Vüqar Ağayev

AZƏRTAC-ın xüsusi müxbiri

Cakarta

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.