Bakı, 12 noyabr, AZƏRTAC

Noyabrın 12-də “Azərbaycanda orta məktəblərin yuxarı sinif şagirdləri üçün informatika fənninin tədrisinin təkmilləşdirilməsinə dəstək” layihəsinin təqdimatı olub.

AZƏRTAC xəbər verir ki, layihə BP və onun Azəri-Çıraq-Günəşli, Bakı-Tbilisi-Ceyhan, Şahdəniz və Cənubi Qafqaz Boru Kəməri layihələrindəki tərəfdaşları – SOCAR, TPAO, PETRONAS, Chevron, LUKOIL, NICO, Equinor, INPEX, ExxonMobil, SGC, ITOCHU, ONGC, TOTAL şirkətləri tərəfindən təqdim edilib.

Layihə BP və tərəfdaşlarının təhsilin inkişafına və ümumiyyətlə bütün səviyyələrdə yerli potensialın və bacarıqların gücləndirilməsinə dəstək vermək səylərinin bir hissəsidir. Layihənin məqsədi orta məktəblərin yuxarı sinif şagirdlərinə müasir və rəqabətədavamlı informatika bilikləri və bacarıqları aşılamaq və beləliklə onların yeni qlobal informasiya iqtisadiyyatına inteqrasiyasına kömək etməkdir.

Tədbirdə “BP Azerbaijan” şirkətinin əlaqələr, xarici işlər və strategiya üzrə vitse-prezidenti Bəxtiyar Aslanbəyli layihə barədə fikirlərini bildirib, orta məktəblərin şagirdləri üçün informatika fənninin tədrisinin təkmilləşdirilməsinin, məktəblilərin informasiya texnologiyaları bacarıqlarının artırılmasının əhəmiyyətini diqqətə çatdırıb.

“Bugünkü gənclərin karyera seçimindən asılı olmayaraq, informatika sahəsində düzgün bilik və bacarıqlara yiyələnməsi onların bu rəqəmsal dövrdə öz arzu və məqsədlərinə çatmasına kömək edəcək. Təqdim etdiyimiz layihədən indiki mərhələdə 50 müəllim və 600 nəfərədək şagird bəhrələnir. Ümid edirik ki, layihə informasiya texnologiyaları vasitəsilə sıx bağlanmış bu yeni dünyamızda onlara uğur qazanmaq üçün lazımi bacarıq və biliklər verəcək”, - deyən B.Aslanbəyli layihənin uğurla reallaşdırılacağına əminliyini vurğulayıb.

Təhsil nazirinin müavini Məhəbbət Vəliyeva müasir cəmiyyətdə İKT-nin mühüm rolundan danışıb, Azərbaycan Prezidenti İlham Əliyevin ölkəmizdə bu sahənin inkişafına xüsusi önəm verdiyini bildirib.

“Azərbaycan Respublikasında təhsilin inkişafı üzrə Dövlət Strategiyası”nın əhəmiyyətini qeyd edən təhsil nazirinin müavini təhsildə İKT-nin tətbiqi ilə bağlı çox geniş strateji hədəflərin müəyyənləşdirildiyini vurğulayıb. M.Vəliyeva müvafiq pilot layihənin gələcəkdə genişlənəcəyinə inamını ifadə edib.

Beynəlxalq Təlim və Layihə Mərkəzinin icraçı direktoru Taryel Dövlətov qeyd edilən layihə haqqında ətraflı məlumat verib.

Üçillik layihə çərçivəsində Təhsil Nazirliyi ilə əməkdaşlıqda informatika təmayüllü orta məktəblər üçün yeni kurikulum və bu sahədə əlavə dərs və tədris vəsaitlərinin hazırlanması nəzərdə tutulur. Bundan əlavə, Bakıdan seçilmiş 25 orta məktəbin 50 müəlliminə ingilis dili, müasir dünyada informatika və onun prinsipləri, informatika mövzuları üzrə təlimlər də keçilir. Həmin müəllimlər yeni hazırlanmış kurikulumun, yeni dərs və tədris vəsaitlərinin ilk tətbiqini öz məktəblərində həyata keçirəcəklər.

Təhsil Nazirliyinin tərəfdaşlığı ilə Beynəlxalq Təlim və Layihə Mərkəzi tərəfindən icra edilən layihənin ümumi dəyəri təxminən 800 min AZN təşkil edir.