İQTİSADİYYAT
İpoteka və Kredit Zəmanət Fondunun fəaliyyəti “Fitch Ratings” tərəfindən növbəti dəfə qiymətləndirilib
Bakı, 28 fevral, AZƏRTAC
Azərbaycan Respublikası İpoteka və Kredit Zəmanət Fondunun fəaliyyətinin “Fitch Ratings” agentliyi tərəfindən növbəti qiymətləndirilməsi həyata keçirilib. Agentliyin qiymətləndirilməsinə əsasən fondun uzunmüddətli xarici və yerli valyutada defolt reytinqi “BB+” səviyyəsində (proqnoz “stabil”) təsdiq edilib.
Fonddan AZƏRTAC-a bildirilib ki, agentliyin “Hökumətlə əlaqəli şəxslərin reytinq meyarları”na əsasən, fondun reytinqi Azərbaycan Respublikasının suveren reytinqinə bərabərdir. Bu, fondun 100 faiz dövlətə məxsus olması, İpoteka və Kredit Zəmanət Fondunun fəaliyyətinə ciddi nəzarət olunması və fondun ölkənin iqtisadi siyasətində strateji əhəmiyyətinə malik olması ilə əlaqədardır. Reytinq həmçinin, fondun davamlı kapitallaşması, Mərkəzi Bankın İpoteka və Kredit Zəmanət Fondunun emissiya etdiyi istiqrazlara verdiyi likvidlik dəstəyi şəklində olan dövlət dəstəyini əks etdirir.
“Fitch Ratings” fondun fəaliyyətinin dövlət tərəfindən dəstəklənməsini güclü olaraq qiymətləndirib və qurulduğu gündən etibarən hökumətin fonda davamlı dəstək göstərilməsini qeyd edib. Sahibkarların kreditlərinə təminat və hesablanmış faizlərə görə subsidiyaların verilməsi vəzifələri fondun mandatına əlavə edildikdən sonra bu dəstəyin miqyası daha da artıb. 2018-ci ildə fondun kapitallaşması məqsədilə dövlət büdcəsindən 100 milyon manat məbləğində vəsait ayrılıb və ötən ilin sonuna kapitalı 466 milyon manata çatıb.
Agentliyin mülahizəsinə görə, orta müddətli dövrdə də kapital dəstəyi və Mərkəzi Bankın likvidlik dəstəyi şəklində fondun dövlət tərəfindən dəstəklənməsi davam edəcək. Qeyd olunanlarla yanaşı, fondun gəlir vergisinin ödənilməsindən azad olunması və əldə edilən mənfəətdən sərbəst istifadə hüququ kimi dövlət dəstəyindən də faydalanır.
Əhalinin əlverişli şərtlərlə yaşayış sahələri ilə təmin edilməsinin Azərbaycan üçün prioritet məsələ olduğunu nəzərə alaraq “Fitch Ratings” hesab edir ki, dövlətin mənzil siyasətində fond strateji əhəmiyyətə malikdir. Fondun daxili fond bazarında mövqeyi güclüdür. İpoteka və Kredit Zəmanət Fondu Maliyyə Nazirliyi və Mərkəzi Bankdan sonra daxili istiqraz bazarının üçüncü böyük iştirakçısıdır.
Fondun qeyri-kommersiya missiyasına baxmayaraq, agentlik hesab edir ki, İpoteka və Kredit Zəmanət Fondu sağlam maliyyə vəziyyətini qorumağa davam edəcək. Bu, müntəzəm dövlət yardımları, ucuz maliyyələşdirmə, fondun ipoteka portfelinin keyfiyyəti və qənaətbəxş likvidlik mövqeyi ilə təmin olunacaq.