Bakı, 1 mart, AZƏRTAC

Tehranda “Qadınlar, Davamlı Sülh və Təhlükəsizlik” mövzusunda beynəlxalq tədbir keçirilib.

Tədbirdə Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanovanın rəhbərliyi etdiyi nümayəndə heyəti iştirak edib.

Komitədən AZƏRTAC-a bildiriblər ki, İran İslam Respublikası Prezidentinin qadın və ailə məsələləri üzrə vitse-prezidenti xanım Məsumə Ebtekar tərəfindən təşkil edilmiş tədbirdə BMT-nin qadınlar təşkilatının (UN WOMEN) Asiya və Sakit okean üzrə regional direktoru, Əfqanıstan İslam Respublikasının Qadın Məsələləri üzrə naziri xanım və başqa yüksək səviyyəli qonaqlar iştirak ediblər.

Rəsmi hissədə çıxış edən S.Qəhrəmanova Azərbaycan Respublikasının ailə, qadın və uşaq siyasətinin ayrı-ayrı istiqamətləri barədə iştirakçılara ətraflı məlumat verib. Sədr müavini dünyada ekstremizm və zorakılığın, terrorizmin, dini, milli, irqi ayrı-seçkiliyin müşahidə olunduğunu, tolerant yanaşmanın zəif olması nəticəsində mənfi tendensiyanın artdığını qeyd edib.

S.Qəhrəmanova diqqətə çatdırıb ki, ölkəmizdə insan hüquqlarının müdafiəsi çərçivəsində qadın və uşaq hüquqlarının müdafiəsi sahəsində mühüm qərarlar qəbul olunub, Azərbaycan Respublikasının Prezidenti İlham Əliyev tərəfindən uğurla davam etdirilən bu siyasət nəticəsində ölkəmizdə bu istiqamətdə çoxsaylı nailiyyətlər əldə olunub və güclü qanunvericilik bazası formalaşdırılıb.

Çıxışında komitə sədrinin müavini xüsusilə qeyd edib ki, cəmiyyətimizin ən həssas təbəqəsi Ermənistan-Azərbaycan Dağlıq Qarabağ münaqişəsi nəticəsində öz doğma yurdlarından qaçqın və məcburi köçkün vəziyyətinə düşən ailələrdir. 1992-ci il fevralın 26-nın Azərbaycan tarixində ən qanlı səhifələrdən biri olan Xocalı soyqırımının törədildiyini bildirən S.Qəhrəmanova bu soyqırımı nəticəsində günahsız insanların, o cümlədən qadın və uşaqların erməni qəsbkarları tərəfindən vəhşicəsinə işgəncəyə məruz qalması və qətlə yetirilməsi, 8 ailənin tamamilə məhv edilməsi, minlərlə insanın yaralanması və itkin düşməsi faktlarını diqqətə çatdırıb. Artıq 25 ildir atəşkəs rejiminin elan olunmasına baxmayaraq, erməni silahlı qüvvələri tərəfindən dəfələrlə atəşkəsin pozulması halları olub, nəticədə mülki şəxslər, uşaqlar yaralanır, qətlə yetirilir, mülki obyektlərə ziyan vurulur. Belə vəziyyətdə qadınların yaşadıqları stress, fiziki və psixoloji zorakılıq uzun müddət, bir çox hallarda isə həyatları boyu davam edir. Biz hər hansı bir uşağın və ya qadının istər azərbaycanlı olsun, istərsə də digər millətin nümayəndəsi, müharibədən əziyyət çəkməsinə qarşıyıq.

Tədbir iştirakçılarına Azərbaycanda qaçqın və məcburi köçkün qadın və uşaqların vəziyyətinin yaxşılaşdırılması istiqamətində dövlət tərəfindən görülən işlər barədə də məlumat verilib. Azərbaycan Respublikasının Prezidenti İlham Əliyevin bu sahədə apardığı uğurlu dövlət siyasətinin əsas istiqamətləri qeyd edilib. S. Qəhrəmanova bildirib ki, Azərbaycanın Birinci vitse-prezidenti xanım Mehriban Əliyevanın rəhbərliyi ilə belə həssas təbəqədən olan insanlar üçün çox böyük işlər görülür. Onların yenidən cəmiyyətimizə inteqrasiyası, sosial müdafiəsi, yaşayış şəraitinin yaxşılaşdırılması və reabilitasiyası hökumətimizin xüsusi diqqət göstərdiyi məsələlərdir. Ötən müddət ərzində onlarla yeni qəsəbə salınıb, məktəblər, uşaq bağçaları, tibb məntəqələri, mədəniyyət mərkəzləri tikilib. Əlbəttə, bu insanlar üçün nə qədər imkanlar yaradılsa da, onların bir arzusu var. O da doğma torpaqlara qayıtmaqdır.

Konfrans çərçivəsində S.Qəhrəmanova İran İslam Respublikası Prezidentinin qadın və ailə məsələləri üzrə vitse-prezidenti xanım Məsumə Ebtekar ilə görüşüb. Söhbət zamanı, son dövrlərdə ölkəmizdə qadınlarla bağlı aparılan dövlət siyasəti və reallaşan layihələr barədə məlumat verilib. Öz növbəsində xanım vitse-prezident də İran İslam Respublikasında qadınlarla bağlı görülmüş işlərdən danışıb.

Daha sonra nümayəndə heyəti İranın rabitə və informasiya texnologiyaları naziri Məhəmməd Cavad Azəri Cəhromi və nazirliyin qadın məsələləri üzrə müşaviri ilə ikitərəfli görüş keçirib, qadınların İKT-də inkişafı sahəsində hər iki ölkədə görülmüş işlər barəsində fikir mübadiləsi aparılıb.

Sədr müavini İran İslam Respublikasının Prezidenti aparatının qadın məsələləri şöbəsinin informasiya məsələləri üzrə məsul nümayəndəsinə Azərbaycanda qadın siyasəti haqqında son dövrlərdə görülmüş işlər barəsində müsahibə verib.

Səfər qarşılıqlı təcrübə mübadiləsi baxımından səmərəli keçib.