CƏMİYYƏT
“İxtisas bələdçisi” maarifləndirmə seminarı başa çatıb
Bakı, 10 avqust, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Mərkəzi Karyera filialının təşkilatçılığı, Gənc Müəllimlər Assosiasiyası və Gənclərin İnkişaf və Karyera Mərkəzinin dəstəyi ilə “İxtisas bələdçisi” maarifləndirmə seminarları təşkil edilib.
Agentliyin Strateji kommunikasiya departamentindən AZƏRTAC-a verilən məlumata görə, iki həftə davam edən layihə çərçivəsində 11 region - 51 rayon və şəhərdə görüşlər keçirilib.
Seminarlarda iştirakçılara ixtisas seçiminin aparılması meyarları, düzgün kodlaşdırma qaydaları, prosesin psixoloji aspektləri, əsas ixtisaslar və onların gələcək perspektivləri haqqında məlumatlar verilib, özünütanıma, özünüinkişafın əhəmiyyəti, bacarıq və istedadların müəyyən olunmasının yolları izah olunub.
Maarifləndirmə seminarlarında ümumtəhsil məktəblərinin 9-11-ci sinif şagirdləri, abituriyentlər, onların valideynləri və müəllimlər də daxil olmaqda 6 mindən artıq vətəndaş iştirak edib.