MƏDƏNİYYƏT
Kamalə Kamal: Mədəniyyət xadimlərimizin dünya miqyasında tanıdılması Ümummilli Liderimizin həyat tərzinə çevrilmişdi
İstanbul, 9 may, AZƏRTAC
Xalqımızın ümummilli lideri Heydər Əliyev XX əsrin ikinci yarısından başlayaraq Azərbaycanın ictimai-siyasi həyatına fəal dövlət rəhbəri kimi daxil olub. Ulu Öndərin apardığı məqsədyönlü, doğru siyasətin nəticəsidir ki, ötən bu dövr ərzində Azərbaycan hər sahədə olduğu kimi mədəniyyətdə də sürətlə inkişaf edib və bu gün dünyada adından söz etdirir. Əsası Ulu Öndər tərəfindən qoyulan müasir müstəqil Azərbaycan mədəniyyətinin inkişafı xalqımızın milli dəyərlərinin qorunması və təbliğinə yönəldilib. Çox zəngin mədəniyyəti, tarixi olan Azərbaycan xalqı bununla fəxr etməkdə haqlıdır. Bu gün Azərbaycan dünyada milli mədəniyyət nümunələri ilə özünəməxsus yerini tutub.
Bu fikirləri AZƏRTAC-a müsahibəsində Türkiyə-Azərbaycan Vizyon Teatrının qurucusu və “Xarıbülbül” Azərbaycan Vizyon Teatr Dərnəyinin rəhbəri Kamalə Kamal deyib.
Ümummilli Liderin ölkəmizə rəhbərliyi dövründə musiqi, balet, teatr, kino sahəsində uğur qazanan istedadların Azərbaycandan kənarda tanınması üçün məqsədyönlü tədbirlər həyata keçirdiyini xatırladan teatr rəhbəri deyib: “Ulu Öndərimiz hələ Sovet İttifaqı dövründə Azərbaycanın dahi mədəniyyət xadimlərinin yubiley mərasimlərinin təkcə ölkəmizdə deyil, digər şəhərlərdə də təntənəli şəkildə keçirilməsinə nail olmuşdu. Bununla yanaşı, dramaturgiyamızın banisi Mirzə Fətəli Axundzadənin, böyük dramaturq Cəfər Cabbarlının və ümumiyyətlə, Azərbaycan mədəniyyətinin inkişafında xüsusi yer tutan tarixi şəxsiyyətlərin yubileyləri respublikamızda təntənə ilə qeyd edilib. Bu, o dövr üçün milli mədəniyyətimizin qorunması baxımından olduqca vacib və böyük nailiyyət idi. Ümummilli Liderin müvafiq fərmanlarına əsasən, Məhəmməd Füzulinin 500 illik yubileyinin İraq, İran, Türkiyə, Fransa və Rusiyada, dünyaşöhrətli müğənnimiz Bülbülün 100 illik yubileyinin Moskvada, Tiflisdə və Ankarada, unudulmaz bəstəkarımız Qara Qarayevin 80 illik yubileyinin Moskvada və Parisdə, Rəşid Behbudovun 80 illik yubileyinin Moskvada, Azərbaycan xalqının milli eposu “Kitabi-Dədə Qorqud” dastanının 1300 illik yubileyinin Fransada yüksək səviyyədə qeyd olunması Azərbaycanı bir daha yenidən dünyaya tanıtdı. Bu tədbirlərin demək olar ki, hər birində ümummilli liderimiz Heydər Əliyevin şəxsən iştirak etməsi dövlət rəhbəri tərəfindən sənətə, sənətkara verilən yüksək qiymətdir. Bundan əlavə, Ulu Öndər tərəfindən ölkəmizdə yaradılan çoxsaylı kitabxana, mədəniyyət və istirahət parkları, muzeylər, rəsm qalereyası, bədii sərgi salonları, uşaq musiqi və incəsənət məktəbləri milli mədəniyyətimizin tarixinə yazılan tarixi hadisələr sırasına daxil olub və ölkəmiz üçün bütün bunlar unudulmaz hadisələrdir”.
“Mədəniyyət və incəsənət xadimlərinin yaradıcılıq axtarışlarına dayaq olmaq və onların dünya miqyasında tanıdılması ümummilli liderimiz Heydər Əliyevin həyat tərzinə çevrilmişdi. Onun hər bir incəsənət xadiminin əməyinə verdiyi yüksək qiymət sayəsində ölkəmizdə yüzlərlə sənətçisi müxtəlif fəxri adlara layiq görülüb”, - deyən K.Kamal bildirib ki, bu gün müasir dünyada Azərbaycanın layiqli yer tutması və inamla addımlamasında böyük rolu olan bu tarixi şəxsiyyətin layiqli davamçısı Prezident İlham Əliyev ölkəmizin ictimai-siyasi, mədəni həyatında baş verən köklü dəyişikliklərin, böyük yüksəlişin müəllifidir.
Xaricdə yaşayan və fəaliyyət göstərən azərbaycanlı mədəniyyət işçilərinin də dövlətimizin qayğı və diqqətindən kənarda qalmadığını vurğulayan teatr rəhbəri deyib: “Dünyada bənzəri görülməyən Türkiyə-Azərbaycan qardaşlığının ən gözəl təsviri olan Ümummilli Liderimizin “Bir millət, iki dövlət” kəlamı bu gün bütün sahələrdə olduğu kimi, mədəniyyətdə də özünü çox gözəl bir şəkildə göstərir. Bu gün dövlətimizin bizə göstərdiyi diqqətin nəticəsidir ki, Türkiyə-Azərbaycan Vizyon teatrı daha da qanadlanaraq yeni-yeni layihələrə imza atır və iki qardaş ölkə arasında artıq səkkiz ildir bir mədəniyyət körpüsü olmağa, mədəniyyətimizin ölkəmizdən kənarda təbliğinə xidmət edir. İncəsənət xadimləri olaraq, biz gücümüzü əsası Ulu Öndər tərəfindən qoyulan və hazırda dövlətimizin başçısı tərəfindən uğurla davam etdirilən doğru siyasətdən alırıq”.
Günel Məlikova
AZƏRTAC-ın xüsusi müxbiri
İstanbul