Bakı, 8 iyul, AZƏRTAC

2021-ci il iyunun 15-də Azərbaycanın mədəniyyət paytaxtı Şuşa şəhərində Azərbaycan və türk xalqlarının da arzusunda olduğu tarixi bir hadisə yaşandı. Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tərəfindən Şuşa Bəyannaməsinin imzalanması, eləcə də Türkiyənin Şuşada baş konsulluq açmaq barədə qərarı Qarabağa və ətraf rayonlara qayıdacaq azərbaycanlılarla yanaşı, Qarabağda yaşayan ermənilərə də firavan həyat bəxş edəcək.

Bunu AZƏRTAC-a açıqlamasında Milli Məclisin deputatı Kamilə Əliyeva deyib.

K.Əliyeva bildirib ki, Bəyannamə iki ölkə arasında münasibətlərin bütün istiqamətlərində, o cümlədən siyasi, iqtisadi və humanitar əlaqələrin inkişafını təmin edəcək. Bu Bəyannamənin imzalanması dünyada bütün dövlətlər arasında sülhün, dostluğun, tərəfdaşlığın mümkün ola biləcəyi mesajını verdi. Şuşa Bəyannaməsi regionda yerləşən dövlətlərin inkişafına, bu ölkələrdə yaşayan bütün xalqların sülh, əmin-amanlıq və rifah altında yaşamaqlarına xidmət edən bir sənəddir. Qarabağdakı erməni əsilli Azərbaycan vətəndaşlarının ölkəmizin qanunları çərçivəsində firavan yaşamalarına şərait yaradıb.

Hazırda Ermənistanın siyasi, iqtisadi böhran vəziyyətində olduğunu diqqətə çatdıran deputat deyib: “Artıq Ermənistanda bu ölkənin acınacaqlı vəziyyətə düşməsinin səbəbinin məhz separatçı ermənilərin olduğu hamıya yaxşı məlumdur. Erməni siyasətçiləri də, sadə erməni xalqı da artıq bunu açıq şəkildə etiraf edir. Ermənistanın sabiq prezidenti Levon Ter-Petrosyan, ona yaxın olan siyasi dairələr Qarabağın beynəlxalq hüquq baxımından Azərbaycana məxsus olduğunu açıq şəkildə vurğulayırlar. Bir çox hüquq müdafiəçisi, siyasi bloger müharibənin ermənilərə heç bir xeyir verməyəcəyini, azərbaycanlılarla mehribançılıq, dinc yanaşı yaşamağın əhəmiyyətini xalqa çatdırırlar. Ermənistanın baş nazir vəzifəsini icra edən Nikol Paşinyan da Azərbaycanla sülh müqaviləsinin imzalanmasına tərəfdar olduğunu bildirib”.

Azərbaycan, Türkiyə və Ermənistan arasında münasibətlərin tənzimlənməsində ABŞ-ın da maraqlı olduğunu deyən K.Əliyeva qeyd edib ki, bu il iyunun 8-də ABŞ Senatının xarici əlaqələr komitəsində Prezident Baydenin 2022-ci maliyyə ili ilə bağlı dinləmələri keçirilib. Dinləmələr zamanı bir neçə ermənipərəst senatorlar Dövlət Departamentini Azadlığa Dəstək Aktına 907-ci düzəlişi dayandırmaqla, Azərbaycana dəstək olmaqda günahlandırmağa cəhd etdilər. Dövlət katibi Entoni Blinken onların bu sualını diplomatik cavabla, “bu və digər detallar üzərində iş getdiyini” deməklə kifayətləndi. Amerikanın Erməni Milli Komitəsinin və erməni cəmiyyətinin Senatdakı dinləmələrlə bağlı gözləntiləri də özünü doğrultmadı.

Deputatın sözlərinə görə, iyunun 14-də NATO Sammiti çərçivəsində keçirilən ABŞ və Türkiyə prezidentlərinin görüşündən sonra hər iki dövlət başçısı Türkiyə və ABŞ arasında ciddi problemlərin olmadığını və əməkdaşlıq sahələrinin daha böyük olduğunu dilə gətirdilər. Hərçənd görüşdən əvvəl ermənilər ABŞ Prezidentinin Türkiyə və Azərbaycan liderlərinin görüşünə sərt reaksiya verəcəyini düşünürdülər. Ermənilərin bu arzusu da tamamilə puç oldu. Hər zaman kimlərdənsə yardım gözləyən ermənilər nəhayət başa düşməlidilər ki, onların nicat yolu yalnız Azərbaycanla yaxşı münasibətlər qurmaqdadır.

“Bu gün istər Şuşaya, istərsə də işğaldan azad edilmiş digər torpaqlarımıza böyük həcmdə sərmayə qoyulur. Cəmi bir neçə ildən sonra azərbaycanlılar yaşayan bu ərazilər iqtisadi cəhətdən o qədər çiçəklənəcək ki, ermənilər özləri də belə güclü dövlətdə yaşamaq və işləmək üçün imkanlar axtaracaqlar. Onların yoxsul Ermənistan dövlətindən heç bir gözləntiləri olmayacaq. Ermənistanın özündə də istər siyasi, istərsə də iqtisadi vəziyyət çox ağırdır. Azərbaycanla sülh müqaviləsinin imzalanması Ermənistanın yeganə çıxış yoludur”, - deyə deputat fikirlərini tamamlayıb.