Bakı, 26 sentyabr, AZƏRTAC 

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən Bakı şəhərində ali təhsil müəssisələrində tələbə və məzunların əmək bazarına uğurlu inteqrasiyası üçün mütəmadi olaraq aktiv məşğulluq tədbirləri keçirilir.

Tələbə və məzunların işəgötürən müəssisə və təşkilatlarla birbaşa ünsiyyətini reallaşdıran belə tədbirlərdən biri rayon məşğulluq mərkəzlərinin iştirakı ilə sentyabrın 26-da Odlar Yurdu Universitetində “Karyerada ilk addım” devizi altında təşkil edilib.

AZƏRTAC xəbər verir ki, tədbirdə ölkəmizin iri biznes, bank, sığorta şirkətləri və xidmət sahəsi sektorlarının işəgötürən müəssisələri iştirak edib.

Əmək və əhalinin sosial müdafiəsi nazirinin müavini Mətin Kərimli tədbirin əsas məqsədinin məzun və tələbələrə aldıqları ixtisaslar üzrə əmək bazarında olan tələbat haqqında məlumat vermək, işəgötürənlərlə onların bilavasitə qarşılıqlı ünsiyyətini təşkil etmək olduğunu bildirib: ““Karyerada ilk addım” devizi altında təşkil olunan tədbir gənclərin karyera quruculuğu baxımından da mühüm əhəmiyyət daşıyır. Çünki tədbir işəgötürənlərin qısa vaxt ərzində müasir tələblərə cavab verən ixtisaslı kadrların seçimini aparmalarına imkan yaradır. Eyni zamanda, işaxtaran vətəndaşların da layiqli işlə təmin olunmalarına yardım edir. İl ərzində artıq dörd universitetdə belə tədbir keçirilib. İlin sonunadək tədbirlərin sayını 10 çatdırmağı planlaşdırırıq. Bugünkü məşğulluq tədbirində paytaxtın rayon məşğulluq mərkəzləri ilə əməkdaşlıq edən 53 işəgötürən müəssisə və təşkilat iştirak edir. Bunlardan üçü dövlət, 50-si qeyri-dövlət müəssisəsidir. İşəgötürənlər tədbirə 254 vakant iş yeri təqdim ediblər, onlardan 29-u dövlət, 225-i qeyri-dövlətdir. Vakansiyalar əsasən qulluq və xidmət sahələrini əhatə edir. Belə ki, vakansiyaların 77-si qulluq, qalanı xidmət sahələrinə aiddir. Təklif olunan vakant işləri üzrə əməkhaqları 180-1800 manat arasında dəyişir və müraciət edən şəxsin təhsil səviyyəsi və təcrübəsindən asılıdır. Belə tədbirlərdə iştirak edən işaxtaran vətəndaşların, xüsusilə də tələbə və məzunların əmək bazarına inteqrasiyası təmin edilir və onlar öz seçdikləri ixtisas üzrə işə düzəlməkdə müsbət nəticələrə nail olurlar”.

Nazir müavini nazirliyin həyata keçirdiyi digər vacib tədbir olan özünüməşğulluq layihəsi haqqında məlumat verərək bildirib ki, 2016-2017-ci illərdə bu proqramdan 1200 nəfər yararlanıb. Bu il artıq 6800 nəfər özünüməşğulluq proqramına cəlb edilib. Lakin bu sayın 7 minə çatdırılması nəzərdə tutulub. Proqrama cəlb olunanlardan artıq 75 faizi müdafiə prosesindən keçib və ilin sonunadək aktivlərlə təmin olunacaqlar.

M.Kərimli bu il qüvvəyə minmiş işsizlikdən icbari sığorta və məşğulluq haqqında qanunların xidmətlərin keyfiyyətini və sayını artırmağa imkan verdiyini də vurğulayıb.

“Özünüməşğulluq layihələrinin 80 faizi kənd təsərrüfatı sahələrini əhatə edir. Bununla yanaşı, həm xidmət, həm də ticarət sahələrini əhatə edən layihələr də var. Kəndlərdə adətən kənd-təsərrüfatı layihələrinə, şəhərlərdə isə xidmət və istehsalat sahələrinə üstünlük verilir.

İyunda məşğulluq haqqında qanun qəbul edilib və avqustda Azərbaycan Respublikasının Prezidenti İlham Əliyevin müvafiq Fərmanı ilə qüvvəyə minib. Qanunda nəzərdə tutulan yeniliklərdən biri həyata keçirilən tədbirlərin avtomatlaşdırılmasıdır. Belə ki, işsizlərin məhz elektron qaydada qeydiyyatdan keçməsi nəzərdə tutulur. Müəssisələr vakansiya yarandığı müddətdən beş gün ərzində öz vakansiyalarını nazirliyin elektron sistemində qeydiyyatdan keçirəcəklər. Həmin vakansiyalar nazirliyin yenidən işlənən vakansiya bazasında əhatə olunacaq. Vətəndaşlar bu məlumatları nazirliyin internet səhifəsindən əldə edə biləcəklər”,-deyə nazir müavini diqqətə çatdırıb.

Aktiv məşğulluq tədbiri tələbə və məzunlar tərəfindən maraqla qarşılanıb.