CƏMİYYƏT


Könüllülük gənclərin fərdi inkişafa nail olması üçün əvəzsiz vasitədir

Bakı, 28 mart, AZƏRTAC

Könüllük fəaliyyətimə ötən il “ASAN xidmət” mərkəzində başladım. İki ay könüllü olduğum zaman həmin fəaliyyətin mənə bir çox keyfiyyətlər qazandırdığını gördüm. Ən önəmlisi isə könüllülük mənə təmkinli və səbirli olmağı aşılayıb. Könüllülükdən öyrənəcəyim çox şey olduğunu düşünüb fəaliyyətimi davam etdirməyi qərarlaşdırdım. Nəticədə bu il “Yaşıl ASAN” proqramına qoşuldum. Proqram iştirakçısı olaraq həm eko-layihələr haqqında, həm də kompüter biliklərimi artırıram. Burada təcrübəli işçilərin davranışları, vətəndaşlarla rəftarı mənə nümunə olur. Bir sözlə, fərdi inkişafa şahid oluram.

Bu barədə AZƏRTAC-a “Yaşıl ASAN” proqramının Bakı mərkəzi üzrə müvəkkili Əsmər Abbasova məlumat verib.

Ə.Abbasova qeyd edib ki, könüllülük gənclərin əhatəsini genişləndirməsi, yeni dostlar qazanması, fərdi inkişafa nail olması və insani keyfiyyətlərini daha da yüksəltməsi üçün ən gözəl vasitələrdən biridir. Prezident İlham Əliyevin 2020-ci ili Azərbaycanda “Könüllülər ili” elan etməsi könüllülərin Vətənə xidmətinin, onların xeyirxah və təmənnasız fəaliyyətinin dövlətimiz tərəfindən yüksək qiymətləndirilməsinin sübutudur. Bu, könüllülük fəaliyyəti ilə məşğul olanlara böyük dəstək və motivasiya verməklə onları Vətənə, xalqa daha da həvəslə xidmət etməyə sövq edir.

Ə.Abbasova, həmçinin “Yaşıl ASAN” proqramı haqqında da məlumat verərək deyib: “Yaşıl ASAN” proqramı 2015-ci ildən fəaliyyət göstərir. Proqramın 3 əsas məqsədi var: ekoloji maarifləndirmə, ətraf mühitin mühafizəsi və sağlam həyat tərzinin aşılanması. Beş il ərzində bu üç istiqamət üzrə 500-dən çox müxtəlif təlimlər, tədbirlər, eləcə də böyük layihələr həyata keçirilib. Bunlara nümunə olaraq "Yaşıl incəsənət" sərgisinin, "Yaşıl təfəkkür", "Yaşıl dağ", "Eko-memarlıq”, “Bakı Piknik Festivalı” və digər layihələrinin adlarını çəkə bilərəm. Həmçinin “Yaşıl ASAN” proqramı çərçivəsində 1800 ton kağız emala göndərilib. Nəticədə 30 min 600-dən çox ağac xilas olunub.

Mən proqrama bu il qoşulsam da "Yaşıl incəsənət" layihəsinin 3-cü dəfə keçirilən sərgisində könüllü təşkilatçı qismində iştirak etməyə müvəffəq olmuşam. Sərginin məqsədi insanlara Azərbaycanın relyefi, flora və faunası haqqında məlumatı rəssamların gözü ilə çatdırmaq olub. Bu sərgidə 1000-dən çox ziyarətçi iştirak edib.

“Yaşıl ASAN” proqramı təkcə yerli könüllülərlə kifayətlənməyib. Xaricdən proqrama qoşulmaq istəyən gənclər üçün təcrübə layihəsi də hazırlayıb. “Yaşıl ASAN” Azərbaycanda ilk proqramdır ki, xaricdən könüllü cəlb edib. 2017-2019-ci illər ərzində 25 nəfər əcnəbi gənc proqrama qoşularaq ASAN könüllüsü adını qazanıb.

Proqramda maarifləndirmə işlərinə də yer ayrılıb. Belə ki, ətraf mühitin mühafizəsi ilə bağlı paytaxtla yanaşı, regionlarda da vətəndaşlar arasında sorğular, maarifləndirici təlimlər keçirilir. Regionlarda fəaliyyət göstərən “ASAN xidmət” mərkəzlərində də proqramın müvəkkilləri var. Ekoloji müvəkkillər proqram çərçivəsində müxtəlif ekoloji tədbirlər həyata keçirirlər”.

Ə.Abbasova Bakı Slavyan Universitetinin 3-cü kurs tələbəsi olduğunu da diqqətə çatdırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.