REGİONLAR
LƏNKƏRANDA ÇAY YIĞIMININ BİRİNCİ MƏRHƏLƏSİ DAVAM EDİR
Lənkəran, 12 iyun (AZƏRTAC). Lənkəran rayonunun çay plantasiyalarında yığım kampaniyasının birinci mərhələsi davam edir.
İndiyədək plantasiyalardan 80 tona yaxın yaşıl çay yarpağı yığılmışdır. Bu, ötən ilin müvafiq dövrü ilə müqayisədə 30 ton çoxdur.
Rayonun Vilvan kənd sakini, 71 yaşlı təcrübəli çay mütəxəssisi İlyas Əliyevin 2004-cü ildə 4,5 hektar sahədə saldığı yeni çay plantasiyasından bu il ilk dəfə olaraq məhsul yığılır.
Bununla əlaqədar keçirilən və Lənkəran Şəhər İcra Hakimiyyətinin başçısı Tofiq İbrahimovun da qatıldığı mərasimdə fermer İlyas Əliyev başçılıq etdiyi təsərrüfat barədə məlumat verərək bildirmişdir ki, ərazidə yeni texnologiyalar əsasında 180 min ədəd çay kolu əkilmişdir.
İlk yığım kampaniyasında fermer təsərrüfatında 10 ton yaşıl cay yarpağı yığılmışdır. Bu il təsərrüfatın plantasiyalarından 25 ton yaşıl çay yarpağının yığılması nəzərdə tutulmuşdur.
Çayçılıqla məşğul olan fermer təsərrüfatının işçilərini təbrik edən rayon icra hakimiyyətinin başçısı T.İbrahimov, rayonda çay plantasiyalarının genişləndiriləcəyini və bu məqsədlə lazımi texnikaların alınacağını bildirmişdir.
Ölkəmizdə əhalinin ərzaq məhsulları ilə etibarlı təminatına dair Dövlət Proqramında kənd təsərrüfatının bütün sahələri kimi, çayçılığın da inkişaf etdirilməsi nəzərdə tutulmuşdur. Lənkəran rayonunun ərazisində mövcud olan 537 hektar çay sahələrinin bərpası və yeni çay plantasiyalarının salınması ilə əlaqədar rayonun İstisu qəsəbəsində “Yaşıl çay” fermer təsərrüfatının başçısı Araz Yaqubov tərəfindən ayrı-ayrı torpaq payçılarının razılığı ilə kol-kos altında qalmış 40 hektar çay sahəsi özəlləşdirilmişdir. Sahə kol-kosdan təmizləmiş, çay kollarında ağır budama və digər aqrotexniki qulluq işləri aparılmışdır.
“Lənkəran çay-5” ASC tərəfindən 6 hektar, Lənkəran çay filialında 8 hektar, ayrı-ayrı fermer və sahibkarlar tərəfindən 46 hektar, ümumilikdə 100 hektar çay sahəsi kol-kosdan təmizlənmişdir. Hazırda yeni salınmış 9,5 hektar çay sahəsinə aqrotexniki qulluq işləri həyata keçirilir.
“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”na uyğun olaraq rayon ərazisində yeni, daha yüksək keyfiyyət göstəricilərinə malik çay məhsulunun qəbulu və emalını təşkil etmək məqsədi ilə Lənkəranda beynəlxalq standartlara cavab verən, saatda 2,5 ton yaşıl çay yarpağı emal edən yeni çay fabrikinin tikintisi başa çatdırılmışdır.
Lənkəran rayonunun çay plantasiyalarında yığım kampaniyasının birinci mərhələsi iyunun sonunadək davam edəcəkdir.